नर्वेली फरवार्ड एर्लिङ ब्राउट हालान्ड चम्कँदा म्यानचेस्टर सिटीले इंग्लिस प्रिमियर लिगमा सहज जित हात पारेको छ ।
सिटीले घरेलु मैदानमा लेस्टर सिटीलाई ३–१ ले पराजित गर्दै शीर्षस्थानको आर्सनलसँगको अंक दुरी छोट्याएको हो । सिटीको जितमा हालान्डले दुई गोल गर्दा जोन स्टोन्सले एक गोल गरे । लेस्टरका केलिची इहानाँचोले एक गोल फर्काए ।
इतिहाद स्टेडियम म्यानचेस्टरमा शनिबार राति भएको खेलको पाँचौं मिनेटमा जोन स्टोन्सले गोल गर्दै सिटीलाई १–० को अग्रता दिलाए । उनले रोड्रीको पासमा गोल गर्न सफल भएका थिए ।
१३औं मिनेटमा हालान्डले पेनाल्टीमा गोल गर्दै सिटीको अग्रता दोब्बर पारे । २५औं मिनेटमा हालान्डले व्यक्तिगत दोस्रो तथा टोलीका लागि तेस्रो गोल गरेपछि सिटी खेलमा ३–० ले अघि बढ्यो । उनले केभिन डि ब्रुएनाको पासलाई सदुपयोग गरे ।
७५औं मिनेटमा केलिचीले गोल गर्दै खेललाई ३–१ को स्थितिमा ल्याएपनि त्यसपछि थप गोल निस्कन नसक्दा सिटी विजयी हुन सफल भयो ।
यस जितसँगै सिटीले शीर्षस्थानको आर्सनलसँगको अंक दुरी ३ मा छोट्याएको छ । दोस्रो स्थानमा रहेको सिटीको ३० खेलबाट ७० अंक पुगेको छ । समान खेलबाटै शीर्षस्थानको आर्सनलको ७३ अंक छ । पराजित लेस्टर ३१ खेलबाट २५ अंक जोडेर १९औं स्थानमा छ ।
