नर्वेली फरवार्ड एर्लिङ ब्राउट हालान्डको सानदार प्रदर्शनमा म्यानचेस्टर सिटीले इंग्लिस प्रिमियर लिगमा सहज जित हात पारेको छ ।
सिटीले घरेलु टोली लिड्समाथि ३–१ को सहज जित निकालेको हो । पहिलो हाफमा एक गोलको अग्रता बनाएको सिटीले दोस्रो हाफमा दुई गोल गर्दा एक गोल खान पुगेको थियो ।
एलान्ड रोडमा बुधबार राति भएको खेलमा सिटीको जितमा हालन्डले दुई तथा रोड्रीले एक गोल गरे । लिड्सका पास्कल स्ट्रुजिकले एक गोल फर्काए खेलको सुरुवातदेखि नै सिटीले घरेलु टोलीमाथि लगातार दवाव बढाएपनि पहिलो गोलको लागि पहिलो हाफको अन्तिम समय कुर्नुपरेको थियो ।
पहिलो हाफको इन्ज्युरी समयको थप गरिएको पहिलो मिनेटमा रोड्रीले गोल गर्दै सिटीलाई पहिलो हाफमा १–० को अग्रता दिलाए । ५१औं मिनेटमा हालान्डले गोल गर्दै सिटीको अग्रता दोब्बर पारे । उनले ज्याक ग्रेलिसको पासमा गोल गर्न सफल भएका थिए ।
त्यसपछि ६४औं मिनेटमा हालान्डले व्यक्तिगत दोस्रो तथा टोलीका लागि तेस्रो गोल गरेपछि सिटीले खेलमा ३–० को आरामदायी अग्रता बनायो । उनले ज्याक ग्रेलिसकै पासमा गोल गरेका थिए । यससँगै उनले प्रिमियर लिगमा १४ खेलबाट २० गोल पु¥याएका छन् । उनले ३ असिस्ट पनि दिएका छन् । उनी म्यानचेस्टर सिटीबाट प्रिमियर लिगमा सबैभन्दा छिटाे २० गाेल गर्ने खेलाडी बनेका छन् ।
७३औं मिनेटमा पास्कलले गोल गर्दै खेललाई ३–१ को स्थितिमा ल्याएपनि त्यसपछि थप गोल निस्कन नसक्दा सिटी विजयी हुन सफल भयो ।
यस जितसँगै दोस्रो स्थानमा उक्लिएको सिटीले शीर्षस्थानको आर्सनलमाथि दवाव बढाएको छ । सिटीको १५ खेलबाट ३५ अंक पुगेको छ । समान खेलबाटै शीर्षस्थानको आर्सनलको ४० अंक छ । पराजित लिड्स १५ अंक जोडेर १५औं स्थानमा छ ।
