उच्च लयमा रहेका नर्वेली फरवार्ड एर्लिङ ब्राउट हालान्डको दुई गोल मद्दतमा इंग्लिस क्लब म्यानचेस्टर सिटीले नयाँ सिजनको युइएफए च्याम्पियन्स लिगमा सानदार विजयी सुरुवात गरेको छ ।
सिटीले स्पेनिस क्लब सेभियालाई ४–० ले पराजित गर्दै विजयी सुरुवात गरेको हो । सिटीको जितमा हालान्डले दुई गोल गर्दा फिल फोडेन र रुवेन डियासले समान एक गोल थपे ।
रमन सान्चेज पिजुआन सेभियामा मंगलबार राति भएको खेलको २०औं मिनेटमा हालान्डको गोलबाट सिटीले अग्रता लिन सफल भयो । उनले केभिन डि ब्रुएनाको पासमा गोल गर्न सफल भएका थिए ।
घरेलु टोलीलाई लगातार दवावमा राखेपनि सिटीले दोस्रो गोलको लागि दोस्रो हाफ नै कुर्नुपरेको थियो । ५८औं मिनेटमा फिल फोडेनले गोल गर्दै सिटीको अग्रता दोब्बर पारे । ६७औं मिनेटमा हालान्डले फिल फोडेनको पासमा व्यक्तिगत दोस्रो तथा टोलीका लागि तेस्रो गोल गर्दै सिटीलाई सहज जिततर्फ अघि बढाए ।
त्यसपछि इन्ज्युरी समयको थप गरिएको दोस्रो मिनेटमा रुवेन डियासले जोओ क्यान्सेलोको पासमा गोल गर्दै सिटीलाई ४–० को सानदार जित दिलाए ।
यस जितसँगै सिटी समूह ‘जी’ मा ३ अंक जोडेर शीर्षस्थानमा रहेको छ । समान ३ अंक नै रहेपनि डर्टमुन्ड गोलअन्तरमा पछि छ । एफसी कोपेनहेगन र सेभिया अंकविहीन छ ।
यही समूहको अर्काे खेलमा जर्मन क्लब बोरुसिया डर्टमुन्डले डेनिस क्लब एफसी कोपेनहेगनलाई ३–० ले पराजित गरेको छ । डर्टमुन्डको जितमा मार्काे रिउस, राफायल गुरेइरो र जुड बेलिङहमले गोल गरे ।
