जर्मन फरवार्ड काई हाभर्टज र इंग्लिस फरवार्ड मेसन माउन्टको गोलमा लन्डन क्लब चेल्सीले इंग्लिस प्रिमियर लिगमा पाँच खेलपछि जित हात पारेको छ ।
घरेलु मैदानमा चेल्सीले बर्नमाउथमाथि २–० को सहज जित हात पारेको हो । दुवै गोल पहिलो हाफमा सम्भव भएको थियो ।स्टामफोर्ड ब्रिज लन्डनमा मंगलबार राति भएको खेलको १६औं मिनेटमा हाभर्टजको गोलबाट चेल्सीले १–० को अग्रता लिएको थियो ।
उनले रहिम स्टर्लिङको पासमा गोल गर्न सफल भएका थिए । २४औं मिनेटमा मेसन माउन्टले गोल गर्दै चेल्सीलाई पहिलो हाफमा २–० को अग्रता दिलाए । उनले हाभर्टजको पासमा गोल गर्न सफल भएका थिए ।
त्यसपछि दुवै टोलीबाट गोल निस्कन नसक्दा पहिलो हाफको दुई गोल नै चेल्सीको जितमा पर्याप्त बन्यो । चेल्सीले पछिल्लो छैटौं खेल खेल्दा प्रिमियर लिगमा जित हात पारेको हो ।
गत अक्टोवरमा एस्टन भिल्लालाई २–० ले पराजित गरेयता चेल्सीले ब्रेन्टफर्डसँग गोलरहित तथा म्यानचेस्टर युनाइटेडसाग १–१ गोलको बराबरी खेलेपछि ब्राइटनसँग ४–१, आर्सनलसँग १–० र न्यूक्यासलसँग २–० ले पराजित भएको थियो ।
यस जितसँगै चेल्सी १५ खेलबाट २४ अंक जोडेर आठौं स्थानमा उक्लिएको छ । पराजित बर्नमाउथ १६ खेलबाट १६ अंक जोडेर १४औं स्थानमा छ ।
