अर्जेन्टिनी लियोनेल स्कोलानी क्यानडा, अमेरिका र मेक्सिकोमा हुने सन् २०२६ को विश्वकपसम्म अर्जेन्टिनाको मुख्य प्रशिक्षक रहने भएका छन् ।
अन्तर्राष्ट्रिय मैत्रीपूर्ण खेलमा जमैकालाई ३–० ले पराजित गरेपछि अर्जेन्टिन फुटबल संघ (एएफए) ले स्कालोनीसँगको सम्झौता थप चार वर्षको लागि नविकरण गरेको छ । अब अर्जेन्टिना थप चार वर्ष स्कोलानीकै प्रशिक्षणमा रहनेछ ।
सन् २०१८ मा रुसमा भएको विश्वकपमा प्रि–क्वाटरफाइनलमा फ्रान्ससँग पराजित भएपछि जर्ज साम्पाओलीलाई प्रतिस्थापन गर्दै स्कालोनीले अर्जेन्टिनाको मुख्य प्रशिक्षक बनेका थिए । एएफएका अध्यक्ष चिक्की टापियाले प्रशिक्षक स्कालोनीसँगको सम्झौता नविकरण पुष्टि गरेका छन् ।
‘म तपाईलाई यो कुरा सुनाउन पाउँदा गर्व महसुस गर्छु कि हामीले २०२६ को विश्वकपसम्म अर्जेन्टिनाको प्रशिक्षकको रुपमा स्कोलानीलाई निरन्तरता दिने कुरामा सहमत भएका छौं । हामी राष्ट्रिय टोलीको विस्तृत परियोजनामा प्रतिबद्ध छौं ।’ तापियाले भने । अध्यक्ष तापियाले सामाजिक सन्जालमा स्कोलानीसँगको तस्विर शेयर गरेका छन् । तस्विरमा दुवै जना मुस्कुराएका छन् ।
दुई महिनाभित्रै कतारमा हुने विश्वकपमा अर्जेन्टिनालाई च्याम्पियन बनाउने चुनौती स्कोलानीसँग छ । तर, एएफएले कतार विश्वकप अघि नै उनीमाथि विश्वास देखाउँदै सन् २०२६ सम्मको लागि सम्झौता नविकरण गरेको छ ।
जमैकामाथिको जितसँगै स्कोलानीले पनि अर्जेन्टिनाकै प्रशिक्षकको रुपमा निरन्तरता दिन इच्छा व्यक्त गरेका थिए । ‘म राष्ट्रिय टोलीमा रहिरहन चहान्छु । मेरो अध्यक्ष तापियासँग राम्रो सम्वन्ध छ । हामीले भेट्यौं । हामी लयमा छौं ।’ ४४ वर्षीय स्कोलानीले भने ।
लियोनेल मेस्सी, पाउलो डिबाला र लोउटारो मार्टिनेजजस्ता फरवार्डहरु पछिल्लो महिना लयमा रहँदा अर्जेन्टिनालाई कतार विश्वकपमा दावेदार टोलीको रुपमा हेरिएको छ ।
२०१७–१८ मा सहायक प्रशिक्षक र २०१८ मा अन्तरिम प्रशिक्षक हुँदै अर्जेन्टिनाको मुख्य प्रशिक्षक बनेका स्कोलानीको प्रशिक्षणमा अर्जेन्टिनाले ४९ खेल खेल्दा ३३ जित, १२ बराबरी र ४ हारको नतिजा निकालेको छ ।
स्कोलानीकै प्रशिक्षणमा अर्जेन्टिनाले गत वर्ष कोपा अमेरिका कप र फाइनालिसिमाको उपाधि जितेको थियो ।
