आईसीसी विश्वकप लिग टू अन्तर्गतको सिरिजमा अमेरिकाले स्कटल्याण्डलाई २ विकेटले पराजित गरेको छ ।
गयराति भएको खेलमा स्कटल्याण्डले दिएको २५० रनको लक्ष्य अमेरिकाले अन्तिम ओभरको १ बल बाँकी हुँदा ८ विकेट गुमाएर पूरा गरेको थियो ।
अमेरिकाका लागि एरोन जोन्सले ६२ रन बनाउँदा मोनाक पटेलले ५० रनको पारि खेले ।
यस्तै जसकरण मलहोत्रा ३६ रनमा नटआउट रहँदा गजानन्द सिंहले ३३ रन बनाएका थिए भने सुसान्त मोदनीको ब्याटबाट २८ रन बन्यो ।
स्कटल्याण्डका लागि हम्जा ताहिर, मिचेल लेस्क र गाभिन मेनले समान दुई दुई विकेट लिएका थिए ।
पहिला ब्याटिङ गरेको स्कटल्याण्डका लागि कलुम म्याकलोडले नटआउट १३३ रनको शतकीय पारि खेल्दा मिचेल लेस्कले ४१ रन बनाएका थिए ।
अमेरिकाका इयान होलान्डले ३ विकेट लिँदा सौरभ नेत्रवाल्कर र स्टेभन टेलरले दुई दुई विकेट लिए ।
विश्वकप लिग अन्तर्गत अमेरिका अहिले तालिकाको तेस्रो स्थानमा रहेको छ भने स्कटल्याण्ड दोस्रो स्थानमा छ ।
ओमान अहिले ४४ अंकका साथ शीर्ष स्थानमा रहँदा स्कटल्याण्डको ४० तथा अमेरिकाको २८ अंक रहेको छ ।
ओमानले सिरिजका ३६ खेल खेलिसकेको छ भने स्कटल्याण्ड र अमेरिकाले २८–२८ खेल खेलेका छन् ।
यो साइकलमा नेपालले १७ अंक जोडेर छैटौं स्थानमा आफूलाई राखेको छ ।
अब नेपालले १६ खेल खेल्न बाँकी छ ।
