सीप्यान क्रिकेट अवार्डमा पुरुषतर्फ दीपेन्द्र सिंह ऐरी र महिलातर्फ सीता राना मगर उत्कृष्ट खेलाडी घोषित भएका छन् ।
नेपाली क्रिकेट खेलाडीहरुको संस्था नेपाल क्रिकेट खेलाडी संघ (सीप्यान)ले आयोजना गर्ने अवार्डबाट ऐरी र रानामगरले उत्कृष्ट खेलाडीको अवार्ड जितेका हुन् ।
ऐरीले वर्षको उत्कृष्ट पुरुष तथा सीता राना मगरले वर्षको उत्कृष्ट महिला खेलाडीको अवार्ड हात पारे । ऐरी र राना मगरले समान समान १ लाख ३२ हजार रुपैयाँ नगद पुरस्कार प्राप्त गरे ।
पुरुषतर्फ ऐरीसहित करण केसी, रोहित पौडेल र कुशल भुर्तेल मनोनयनमा रहेका थिए ।
महिलातर्फ सितासँगै ज्योति पाण्डे, इन्दु बर्मा कविता कुँवर र रुबिना क्षेत्री मनोनयनमा परेका थिए ।
पूर्वकप्तान पारस खड्काले विशेष अवार्ड हात पारे । उनले उत्कृष्ट खेलाडीसरह १ लाख ३२ हजार रुपैयाँ हात पारे ।
यस्तै समर्थकहरुको भोटिङका आधारमा छनौट गरिएको ‘मोमेन्ट अफ दि ईअर अवार्ड’ अस्मिना कर्माचार्यले जितिन् ।
उनले ६६ हजार रुपैयाँ नगद हात पारिन् ।
उनले एसीसी महिला टी–२० च्याम्पियनसिपमा युएईविरुद्ध ५ विकेट लिएकी थिइन् ।
यो विधामा स्कटल्याण्डविरुद्धको नेपालको जित, पपुवा न्युगिनीविरुद्धको टी–२० र एक दिवसीयमा बनाएका दीपेन्द्र सिंह ऐरीका शतक, कुशल भुर्तेलले डेब्युसहितका ३ खेलमा बनाएका तीन अर्धशतक र केन्यामा सन्दिप लामिछानेले एकै खेलमा लिएको ५ विकेटलाई समावेश गरिएको थियो ।
ईमर्जिङ प्लेअर अफ दि ईअर विजेता यू–१९ क्रिकेट कप्तान देव खनाल भए । यो विधाको मनोनयनमा राष्ट्रिय टिमका ब्याटर खनालसहित अलराउण्डर आदिल आलम, बलर सागर ढकाल, ब्याटर लोकेश बम र महिला टोलीकी उदीयमान बलर हिरनमई रोय मनोनयनमा परेका थिए । अवार्ड जितेका खनालले ६६ हजार रुपैयाँ नगद प्राप्त गरे ।
