म्यानचेस्टर — नथान एकेको निर्णायक गोलको मद्दतले म्यानचेस्टर सिटीले बिहीबार लिभरपुललाई ३–२ ले हराएको छ । यस नतिजासँगै डिफेन्डिङ च्याम्पियन लिभरपुल लिग कपबाट बाहिरिएको छ ।
एतिहाडमा भएको अन्तिम १६ को खेलसँगै इंग्लिस फुटबलको दुई ठूला क्लब विश्वकपको विश्रामपछि मैदानमा फर्केका हुन् ।
इंग्लिस प्रिमियर लिग विजेता सिटीले इर्लिङ हल्यान्ड र रियाद मेहराजको गोलको मद्दतले दुईपल्ट अग्रता लिएपनि दुवै अवसरमा लिभरपुल खेलमा फर्कन सफल भएको हो । लिभरपुलका लागि फाबियो कारभाल्हो र मोहम्मद सलाहले गोल गरे । एकेको गोलपछि भने लिभरपुल त्यसलाई उत्टाउन असफल रह्यो ।
सिटीले विश्वकपमा खेलेका छ खेलाडीसहित खेल सुरु गरेको थियो भने लिभरपुलले भने आफ्नो बलियो टिम उतारेको थियो । गत सिजन लिभरपुलले चेल्सीलाई हराएर कीर्तिमान नवौंपल्ट लिग कप जितेको थियो ।
