एक खेल बाँकी छँदै युइएफए च्याम्पियन्स लिगको नकआउट चरणमा स्थान पक्का गरिसकेको इंग्लिस क्लब म्यानचेस्टर सिटीले समूह चरणको अन्तिम खेलमा पूनरागमन जित निकाल्दा जर्मन क्लब बोरुसिया डर्टमुन्ड बराबरीमा रोकिएको छ ।
सिटीले घरेलु मैदानमा एक गोलले पछि परेको स्थिति उल्ट्याएर ३–१ को पूनरागमन जित निकालेको छ । सिटीको जितमा रिको लेविस, जुलियन अल्भारेज र रियाद महारेजले गोल गर्दा सेभियाका राफा मिरको गोल सान्त्वना बन्यो ।
इतिहाद स्टेडियम म्यानचेस्टरमा बुधबार राति भएको खेलको ३१औं मिनेटमा राफा मिरको गोलबाट सिटी पछि परेको थियो ।उनले इस्कोको पासमा गोल गरेका थिए । ५२औं मिनेटमा रिकोले जुलियन अल्भारेजको पासमा गोल गर्दै खेललाई १–१ गोलको बराबरीमा ल्याए ।
७३औं मिनेटमा अल्भारेजले केभिन डि ब्रुएनाको पासमा गोल गर्दै सिटीलाई २–१ को अग्रता दिलाए । ८३औं मिनेटमा महारेजले अल्भारेजको पासमा गोल गर्दै सिटीलाई ३–१ को पूनरागमन जित दिलाए ।
अर्काे खेलमा डर्टमुन्ड डेनिस क्लब कोपेनहेगनसँग १–१ गोलको बराबरीमा रोकिएको छ । डर्टमुन्डका थोर्गन हाजार्डले गोल गर्दा कोपेनहेगनका हाकोन अर्नर हाराल्डसनले बराबरी गोल फर्काए ।
यस नतिजासँगै सिटीले ६ खेलबाट १४ अंक जोड्यो । डर्टमुन्ड ९ अंक जोडेर दोस्रो स्थानमा रह्यो । सेभियाले ५ अंक जोड्दा कोपेनहेगन ३ अंक जोडेर पुछारमा रह्यो ।
