विश्वकप क्रिकेटमा अष्ट्रेलियाको शानदार जितले इंग्ल्याण्डलाई संकटमा पार्यो

आईसीसी टी-२० विश्वकपमा अष्ट्रेलियाले आइतबार विहान इंग्ल्याण्डलाई ३६ रनले पराजित गर्दै लगातार दोस्रो जित निकालेको छ।

पहिले ब्याटिङ गरेको अष्ट्रेलियाले २० ओभरमा ७ विकेट गुमाएर २०१ रन बनायो, जवाफमा इंग्ल्यान्डले ५ विकेट गुमाएर १६५ रन मात्र बनाउन सक्यो।

टस हारेर ब्याटिङमा आएको अष्ट्रेलियाका डेभिड वार्नर र ट्राभिस हेडले पहिलो ५ ओभरमा ७० रनको शानदार सुरुवात गराए। यो साझेदारी मोइन अलीले तोड्दै वार्नरलाई ३९ रनमा आउट गरे। वार्नरले १६ बलमा दुई चौका र एक छक्का प्रहार गरेका थिए। अर्को ओभरमा हेड पनि १८ बलमा ३४ रन बनाएर आउट भए।

कप्तान मिचेल मार्स र ग्लेन म्याक्सवेलले छिटो रन बनाएर स्कोर १३९ मा पुर्याए। मार्सले २५ बलमा ३५ रन बनाए भने म्याक्सवेलले २८ रनको इनिङ खेले। अन्त्यमा मार्कुस स्टोइनिसले १७ बलमा ३० रन र म्याथ्यु वेडले १० बलमा नटआउट १७ रन बनाएर अष्ट्रेलियाको स्कोर २०१ रनमा पुर्याए।

लक्ष्य पछ्याउने क्रममा इंग्ल्याण्डले पनि उत्कृष्ट सुरुवात गर्‍यो। फिल साल्ट र कप्तान जोस बटलरले पहिलो विकेटका लागि ७३ रनको साझेदारी गरे। यो साझेदारी आठौं ओभरमा एडम जाम्पाले तोडियो। साल्ट २३ बलमा ३७ रन बनाएर आउट भए भने बटलर २८ बलमा ४२ रन बनाएर १० औं ओभरमा ९२ रनमा आउट भए।

विल ज्याक र जोनी बेयरस्टो सस्तोमा पभेलियन फर्किए। मोइन अलीले १५ बलमा २५ रन बनाएर आउट भए। लियाम लिभिङस्टोनले १२ बलमा १५ रन बनाएर १९ औं ओभरमा आउट भए भने ह्यारी ब्रुकले १६ बलमा २० रन बनाएर अविजित रहे।

अष्ट्रेलियाका लागि एडम जाम्पा र प्याट कमिन्सले समान २ विकेट लिए।

जितसँगै अष्ट्रेलिया २ खेलमा ४ अंकसहित समूह बी मा शीर्ष स्थानमा पुगेको छ। इंग्ल्याण्ड २ खेलमा १ अंक जोडेर चौथो स्थानमा छ भने स्कटल्यान्ड दोस्रो र नामिबिया तेस्रो स्थानमा छन्।