एजेन्सी – इंग्लिस प्रिमियर लिग अन्तर्गत सिजनको पहिलो जित दर्ता गर्ने क्रममा म्यानचेस्टर युनाइटेडले लिभरपुललाई पराजित गरेको छ ।
घरेलु मैदान ओल्ड ट्राफर्डमा युनाइटेडले चिर परिचित प्रतिद्वन्द्वी लिभरपुललाई २-१ ले हरायो । युनाइटेडका लागि जेडन सान्चो र मार्कस रासफर्डले गोल गरे । लिभरपुलका मोहमद सलाहले एक गोल फर्काएका थिए ।
खेलको १६ औं मिनेटमा सान्चोले युनाइटेडलाई अग्रता दिलाए । उनले एन्थोनी एलांगाको कटब्याकलाई पेनाल्टी क्षेत्रभित्र नियन्त्रणमा लिँदै निकै समय लिएर गोलमा परिणत गरे । पेनाल्टी क्षेत्रभित्र निकै संयमित देखिएका उनले दुई डिफेन्डर बिट गर्दै गोल गर्न सफल भएका थिए ।
दोस्रो हाफको सुरुवातमै युनाइटेडले अग्रता दोब्बर पार्यो । दोस्रो हाफमा मैदान प्रवेश गरेका एन्थोनी मार्सियलको पासमा रासफर्डले अफसाइड ट्रयाप बिट गर्दै गोल गरे । ८२ औं मिनेटमा सलाहले गोल गर्दै लिभरपुल खेलमा फर्कने संकेत दिए । पेनाल्टी क्षेत्रभित्र फाबियो कार्भाल्होको प्रहार क्लिअर हुन नसक्दा सलाहले रिबाउन्डमा हेडरमार्फत गोल गरेका थिए ।
प्रशिक्षक टेन हागले लिभरपुलविरुद्ध सुरुवाती ११ बाट कप्तान ह्यारी मगाएर र फरवार्ड क्रिस्टियानो रोनाल्डोलाई बाहिर राखेका थिए । रोनाल्डो ८५ औं मिनेटमा मैदान प्रवेश गर्दा मगाएर बेन्चमा नै रहे । लिसान्ड्रो मार्टिनेज र राफाएल भारानले युनाइटेडको डिफेन्स सम्हालेका थिए ।
यस जितसँगै युनाइटेड अंक तालिकामा लिभरपुलभन्दा माथि उक्लिएको छ । युनाइटेड ३ खेलमा ३ अंक जोड्दै १४ औं स्थानमा छ । लिभरपुल ३ खेलमा २ अंकसाथ १६ औं स्थानमा रहेको छ ।
