म्यानचेस्टर सिटीले इंग्लिस प्रिमियर लिगमा लिभरपुलमाथि सानदार पूनरागमन जित दर्ता गर्दै उपाधि जित्ने सम्भावना जीवितै राखेको छ ।
सिटीले घरेलु मैदानमा एक गोलले पछि परेको स्थिति उल्ट्याएर लिभरपुलमाथि ४–१ को सानदार पूनरागमन जित दर्ता गरेको हो ।
सिटीको पूनरागमन जितमा जुलियन अल्भारेज, केभिन डि ब्रुएना, इल्केए गुन्डोगान र ज्याक ग्रेलिसले गोल गरे । लिभरपुलका मोहम्मद सलाहको गोल सान्त्वना बन्यो ।
इतिहाद स्टेडियममा शनिबार साँझ भएको खेलको १७औं मिनेटमा सलाहको गोलबाट घरेलु टोली सिटी खेलमा पछि परेको थियो । उनले डिएगो जोटाको पासमा गोल गर्न सफल भएका थिए ।
तर, त्यो अग्रतालाई लामो समय जोगाउन सकेन । एक गोलले पछि परेको सिटी २७औं मिनेटमा जुलियन अल्भारेजको गोलबाट खेलमा फर्कियो । उनले ज्याक ग्रेलिसको पासमा गोल गर्दै खेललाई पहिलो हाफमा १–१ गोलको बराबरीमा ल्याए ।
दोस्रो हाफ सिटीकै पक्षमा रह्यो । ४६औं मिनेटमा केभिन डि ब्रुएनाले रियाद महारेजको पासमा गोल गर्दै सिटीलाई २–१ को अग्रता दिलाए । ५३औं मिनेटमा गुन्डोगानको गोलबाट सिटी ३–१ ले अघि बढ्यो । त्यसपछि ७४औं मिनेटमा ब्रुएनाको पासमा ज्याक ग्रेलिसले गोल गर्दै सिटीलाई ४–१ को सानदार पूनरागमन जित दिलाए ।
यस जितसँगै सिटीले शीर्षस्थानको आर्सनलसँगको अंक दुरी ५ मा छोट्याएको छ । सिटीको २८ खेलबाट ६४ अंक पुगेको छ । समान खेलबाटै आर्सनलको ६९ अंक छ । पराजित लिभरपुल ४२ अंक जोडेर छैटौं स्थानमा छ ।
