एजेन्सी – इंग्लिस प्रिमियर लिग क्लब लिभरपुलका मिडफिल्डर थियागो अलकान्तरा ६ साता मैदान बाहिर रहने भएका छन् । ह्यामस्ट्रिङ इन्ज्युरीका कारण उनी ६ साता मैदान बाहिर रहने क्लबले जनाएको छ ।
३१ वर्षीय अलकान्तराले प्रिमियर लिगको पहिलो खेलमा फुलहमसँग २–२ गोलको बराबरीमा रोकिएको खेलमा चोट बोक्न पुगेका थिए । लगातार चोटसँग जुधिरहेका थियागोले एनफिल्डमा दुई सिजन बिताउँदा ४९ प्रिमियर लिगको खेल खेलेका छन् । उनी २०२० मा बायर्न म्युनिखबाट लिभरपुल आएका थिए ।
उनी अक्टोबर मध्यबाट खेलमा फर्कने क्लबले जनाएको छ । थियागोको चोटले लिभरपुललाई थप समस्या सिर्जना भएको छ ।एलेक्स अक्सलेड चेम्वरलेन, कर्टिस जोन्स, नावी केइटा र डिएगो जोटाले पनि चोटकै कारण टोलीसँग उपलब्ध छैनन् ।
थियागोले फुलहमविरुद्ध जोर्डन हेन्डरसन र फाविन्होले लिभरपुलको मिडफिल्ड सम्हालेका थिए । चोट बोकेपछि ५१औं मिनेटमा थियागोलाई हार्वे इलिओटले प्रतिस्थापन गरेका थिए ।
‘मलाई थाहा छ अब के आउनेछ, यो स्पष्ट छ । हामीले भन्यौ हामीलाई मिडफिल्डरको आवश्यकता छैन । हामीसँग पर्याप्त मिडफिल्डर छ । तर अब समस्या यो छ कि हामीले त्यही चीजको सजाय पाउदैछौं ।’ प्रशिक्षक योर्गेन क्लोपले भने, ‘हाम्रा प्राय मिडफिल्डर घाइते छन् । यो अवस्था राम्रो होइन । तर, हामी दवावमा छैनौं ।’
