लिग्स कप फुटबलको उपाधि लियोनल मेस्सीको कप्तानीमा रहेको इन्टर मियामीले जितेको छ ।
आज विहान भएको फाइनलमा मियामी नाशभिललाई टाइब्रेकरमा १०–९ गोल अन्तरले पराजित गर्दै पहिलो पटक च्याम्पियन बनेको हो । मेस्सी यसै सिजन मियामीमा आवद्ध भएका थिए । निर्धारित समय एक एक गोलको बराबरी भएपछि टाइब्रेकरमा पुगेको थियो ।
२३ औं मिनेटमा मेस्सीले गोल गर्दै मियामीलाई अग्रता दिलाएका थिए । तर, ५७ औं मिनेटमा फाफा पिकल्टले गोल गरेपछि खेल बराबरीमा आएको थियो । त्यसपछि थप गोल नभएपछि सडनडेथसम्म पुगेको थियो ।
नाशमिलका रान्दाल लिएल, इलियट पानिचोको प्रहार मिस भएको थियो भने मियामीका भिक्टर उलाका प्रहार खेर गयो ।
११ औं प्रहारमा दुवै टोलीका गोलरक्षकले पेनाल्टी प्रहार गरेका थिए । मायमीका गोलरक्षक क्यालेन्डरले गोल गरेका थिए भने नाशभिलका पानिचोको प्रहार विफल भएपछि मियामी च्याम्पियन बन्न सफल भयो ।
