जर्मन डिफेन्डर एन्टेनियो रुडिगरले अन्तिम समयमा गोल गरेपछि स्पेनिस क्लब रियल म्याड्रिड युइएफए च्याम्पियन्स लिगमा हारबाट जोगिएको छ ।
रियलले समूह चरणको चौथो खेलमा युक्रेनी क्लब साख्तर डोनेस्कसँग १–१ गोलको बराबरी खेल्दै समुहमा अपराजित रहन सफल भएको हो ।
वार्सजावामा मंगलबार राति भएको खेलमा घरेलु टोलीका ओलेकसान्डर जुभकोभले गोल गर्दा रियलका रुडिगरले इन्ज्युरी समयको थप गरिएको पाँचौं मिनेटमा गोल गर्दै रियललाई हारबाट जोगाए ।
प्रतिस्पर्धात्मक बनेको पहिलो हाफ गोलरहित बराबरीमा सकिदा घरेलु टोली साख्तरले दोस्रो हाफको शुरुमै अग्रता लिन सफल भएको थियो । ४६औं मिनेटमा जुभकोभले बोगडानको पासमा गोल गर्न सफल भएका थिए ।
तर, साख्तरले त्यसलाई अन्तिमसमयसम्म जोगाउन नसक्दा जितबाट वञ्चित बन्न पुग्यो । इन्ज्युरी समयको थप गरिएको पाँचौं मिनेटमा रुडिगरले टोनी क्रुसको पासमा हेडरमार्फत गोल गर्दै रियललाई हारबाट जोगाए ।
यस बराबरीसँगै गत सिजनको विजेता तथा सर्वाधिक १४ पटकको च्याम्पियन रियल म्याड्रिड समूह चरणको दुई खेल बाँकी छँदै यस सिजनको च्याम्पियन्स लिगको नकआउट चरणमा प्रवेश गर्न सफल भएको छ ।
रियलले अब समूह चरणमा आरबी लाइप्जिग र सेल्टिकसँग खेल्न बाँकी छ । यि दुई खेलमा अंक गुमाएपनि रियललाई कुनै फरक पर्नेछैन ।
समूह ‘एफ’ मा अपराजित रहेको रियलको ४ खेलबाट १० अंक पुगेको छ । समान खेलबाटै लाइप्जिग ६ अंक जोडेर दोस्रो स्थानमा उक्लदा साख्तर ५ अंक जोडेर तेस्रो तथा १ अंक जोडेको सेल्टिक पुछारमा छ ।
यही समूहको अर्काे खेलमा लाइप्जिगले सेल्टिकलाई २–० ले पराजित गर्दै नकआउट चरण पुग्ने सम्भावना बलियो बनाएको छ ।
