फ्रेन्च लिग वानमा शीर्षस्थानमा रहेको पेरिस सेन्ट जर्मेन (पिएसजी) ले रोमाञ्चक पूनरागमन जित निकालेको छ ।
घरेलु मैदानमा पिएसजीले दुई पटक पछि परेको स्थिति उल्ट्याएर ट्रोएसमाथि ४–३ को रोमाञ्चक जित निकालेको हो ।पिएसजीको जितमा कार्लाेस सोलेरसँगै लियोनेल मेस्सी, नेयमार र केलियन एमबाप्पेले गोल गरे । ट्रोएसका मामा बाल्डेले दुई तथा एन्टी पालाभेर्साले एक गोल गरे ।
पार्क डेस प्रिन्सेसमा शनिबार राति भएको खेलको तेस्रो मिनेटमा नै मामा बाल्डेको गोलबाट पिएसजी पछि परेको थियो । उनले रोनी लोपेसको पासमा गोल गरेका थिए । २४औं मिनेटमा कार्लाेस सोलेरले नेयमारको पासमा गोल गर्दै खेललाई १–१ गोलको बराबरीमा ल्याए ।
५२औं मिनेटमा मामा बाल्डेले व्यक्तिगत र टोलीका लागि दोस्रो गोल गर्दै ट्रोएसलाई पुनः खेलमा २–१ को अग्रता दिलाए । उनले विल्सन ओडोबर्टको पासमा गोल गर्न सफल भएका थिए ।
त्यसको तीन मिनेटपछि मेस्सीले सर्जियो रामोसमा पासमा उत्कृष्ट गोल गर्दै खेललाई २–२ गोलको बराबरीमा ल्याए । ६२औं मिनेटमा नेयमारले मेस्सीको पासमा गोल गरेपछि पिएसजीले खेलमा ३–२ को अग्रता लिन सफल भयो ।
७७औं मिनेटमा एमबाप्पेले पेनाल्टीमा गोल गर्दै पिएसजीलाई जिततर्फ अघि बढाए । ८८औं मिनेटमा एन्टी पालाभेर्साले गोल गर्दै खेललाई ४–३ को स्थितिमा ल्याएपनि त्यसपछि थप गोल निस्कन नसक्दा पिएसजी रोमाञ्चक पूनरागमन जित निकाल्न सफल भयो ।
यस जितसँगै पिएसजीले शीर्षस्थानमा ५ अंकको अग्रता कायम गरेको छ । अपराजित रहेको पिएसजीको १३ खेलबाट ३५ अंक पुगेको छ । पराजित ट्रोएस १३ अंक जोडेर ११औं स्थानमा छ ।
