इटालियन सिरी ‘ए’ मा एसी मिलानले युभेन्ट्सलाई पराजित गरेको छ । घरेलु मैदानमा मिलानले युभेन्ट्समाथि २–० को सहज जित निकालेको हो ।
मिलानको जितमा फिकायो तोमारी र ब्राहिम डियाजले गोल गरे । पहिलो र दोस्रो हाफमा समान एक गोल भएको थियो ।
मिलानोमा शनिबार राति भएको रोमाञ्चक र प्रतिस्पर्धात्मक खेलको पहिलो हाफको इन्ज्युरी समयको थप गरिएको पहिलो मिनेटमा फिकायो तोमारीले गोल गर्दै मिलानलाई १–० को अग्रता दिलाए । उनले ओलिभर जिरुडको पासमा गोल गर्न सफल भएका थिए । त्यसपछि ५४औं मिनेटमा ब्राहिम डियाजले गोल गर्दै मिलानको जित पक्का गरे ।
यस जितसँगै मिलान ९ खेलबाट २० अंक जोडेर तेस्रो स्थानमा उक्लिएको छ । समान २० अंक नै रहेपनि गोल अन्तरमा एक खेल कम खेलेका नेपोली र एटलान्टा पहिलो र दोस्रो स्थानमा रहेको छ । पराजित युभेन्ट्स १३ अंक जोडेर आठौं स्थानमा रहेको छ ।
