अर्जेन्टिनी जेरार्डो ‘टाटा’ मार्टिनो अमेरिकी मेजर लिग सकर (एमएलएस) क्लब इन्टर मियामीको मुख्य प्रशिक्षकमा नियुक्त भएका छन् ।
इन्टर मियामीले अर्जेन्टिना र क्याटलान क्लब बार्सिलोनाका पुर्व प्रशिक्षक मार्टिनोलाई नयाँ प्रशिक्षकमा नियुक्त गरेको हो । ६० वर्षीय मार्टिनोले फिल नेभिलको स्थान लिनेछन् । उनी १ जुनमा बर्खास्त गरिएको थियो ।
इन्टर मियामीको नयाँ प्रशिक्षक नियुक्त भएसँगै मार्टिनो र लियोनल मेस्सीबीच पुनर्मिलन हुने भएको छ । सात पटकका बालोन डी’ओर विजेता मेस्सी र मार्टिनोले यसअघि बार्सिलोना र अर्जेन्टिनाको राष्ट्रिय टोलीमा सँगै रहेका थिए । उनीहरुबीच तेस्रोपटक सहकार्य हुनेछ । मेस्सीले यसै समरमा फ्रान्सेली क्लब पिएसजी छाड्दै मियामी आएका थिए ।
सन् २०२२ को फिफा विश्वकपमा उनी मेक्सिकोका प्रशिक्षक रहेका थिए । मेक्सिको समूह चरणबाटै बाहिरिएपछि अर्जेन्टिनी मार्टिनोले आफ्नो पदबाट राजीनामा दिएका थिए ।
‘टाटा एक उच्च सम्मानित व्यक्तित्व हो । उनको रेकर्ड आफैं बोल्छ ।’ इन्टर मियामीका सह मालि डेभिड बेकह्यामले भने, ‘हामी विश्वस्त छौं कि उनको अनुभवले हाम्रो टोलीलाई प्रेरणा दिनेछ र हाम्रा फ्यानहरूलाई उत्साहित बनाउनेछ उनको प्रभाव हेर्न तत्पर छौं ।’
मार्टिनोले आफ्नो कामको कागजात प्राप्त गरेपछि कोचिङको जिम्मेवारी ग्रहण गर्नेछ । मार्टिनोसँग एमएलएसको अनुभव छ । दुई वर्ष एमएलएस बसाई उनले २०१८ मा एट्लान्टा युनाइटेडलाई एमएलएस कपको उपाधि दिलाएका थिए । इन्टर मियामी १८ खेलबाट १३ हारका साथ तल्लो क्रममा छ ।
