इभान टोनीले दुई गोल गरेपछि म्यानचेस्टर सिटी इंग्लिस प्रिमियर लिगमा ब्रेन्टफर्डसँग स्तब्ध बनेको छ । सिटी घरेलु मैदानमा ब्रेन्टफर्डसँग २–१ ले स्तब्ध बनेको हो ।
इतिहाद स्टेडियममा शनिबार राति भएको खेलमा घरेलु टोली सिटीका फिल फोडेनले गोल गरेपनि हार टार्न सकेन । खेलको १६औं मिनेटमा इभान टोनीले गोल गर्दै ब्रेन्टफर्डलाई १–० को अग्रता दिलाए । उनले हेडरमार्फत गोल गर्न सफल भएका थिए ।
पहिलो हाफको इन्ज्युरी समयको थप गरिएको पहिलो मिनेटमा फिल फोडेनले गोल गर्दै सिटीलाई १–१ गोलको बराबरीमा ल्याए । उनले म्यानुएल एकान्जीको पासमा गोल गर्न सफल भएका थिए ।
त्यसपछि दोस्रो हाफमा इन्ज्युरी समयको थप गरिएको आठौं मिनेटमा इभान टोनीले व्यक्तिगत र टोलीका लागि दोस्रो गोल गर्दै सिटीलाई घरेलु मैदानमा २–१ ले स्तब्ध पारे ।
