स्पेनिस क्लब रियल म्याड्रिडका फ्रान्सेली फरवार्ड करिम बेन्जेमालाई पिचिची अवार्ड प्रदान गरिएको छ।बेन्जेमाले पहिलोपटक यो अवार्ड जितेका हुन् ।
स्पेनिस पत्रिका मार्काले गत सिजन ला लिगामा सर्वाधिक गोलकर्ता रहेका बेन्जेमालाई बुधबार राति यो ट्रफी प्रदान गरेको हो ।
बेन्जेमाले गत सिजन ला लिगामा ३२ खेलमा २७ गोल गर्दै सर्वाधिक गोलकर्ता बनेका थिए । गत सिजन रियल म्याड्रिडले कीर्तिमानी ३५औं पटक ला लिगाको उपाधि जित्दा कप्तान बेन्जेमाले उत्कृष्ट प्रदर्शन गरेका थिए ।
बेन्जेमाले ला लिगा २०२१–२२ मा उत्कृष्ट खेलाडीको लागि अल्फ्रेडो डि स्टेफानो ट्रफी पनि जितेका थिए । साथै बेन्जेमाले समर्थकको मनपर्ने खेलाडीको रुपमा एमभीपी ट्रफी पनि जितेका थिए ।
अल्फ्रेडो डि स्टेफानोले मलाई सधैं मेरो सपनामा विश्वास गर्न र रियल म्याड्रिडमा बिताएका हरेक पलको आनन्द लिन सिकाएको बेन्जेमाले अवार्ड जितेपछि बताए ।
‘म के गरिरहेको छु र म घरमा धेरै राम्रो महसुस गरिरहेको छ । म विश्वको उत्कृष्ट टोलीबाट खेल्न पाउँदा निकै भाग्यमानी छु । म मेरो प्रदर्शनबाट धेरै गर्व गर्छु र यो वर्ष हाम्रो लागि कठिन रहेपनि क्लबलाई धेरै भन्दा धेरै ट्रफी जिताउने छु ।’ बेन्जेमाले भने ।
‘पिचिची ट्रफी जित्नु मेरो लागि धेरै महत्वपूर्ण छ र म मेरो टोलीका साथीहरु, समर्थक र क्लबलाई धन्यवाद दिन चहान्छु । हाम्रा प्रतिद्धन्द्धीहरु प्रत्येक वर्ष ला लिगा जित्न चहान्छन् र यो सधैं परिवर्तन हुन्छ । हामी बलियो टोली हौं, हामी आँफैमा केन्द्रित छौं । भिनि र रोड्रिगो युवा छन् तर रियलका लागि धेरै खेलिसकेका छन् । म पक्का छु कि उनीहरुले पनि एक दिन यो ट्रफी जित्नेछन् ।’
बेन्जेमासँगै प्रशिक्षक कार्लाे एन्सेलोटी र लुनिनले पनि अवार्ड जितेका छन् । पिचिची ट्रफी अर्जेन्टिनी लियोनेल मेस्सीले सर्वाधिक ८ पटक जितेका छन् ।
