कप्तान करिम बेन्जेमाले पहिलो हाफमै ८ मिनेटको अन्तरमा ह्याट्रिक पूरा गरेपछि रियल म्याड्रिडले स्पेनिस ला लिगामा सानदार जित दर्ता गरेको छ ।
रियलले घरेलु मैदानमा रियल भालाडोलिडमाथि ६–० को फराकिलो जित निकाल्दै शीर्षस्थानको बार्सिलोनासँगको अंक दुरी छोट्याएको हो ।
रियलको जितमा बेन्जेमाले ह्याट्रिक पूरा गर्दा रोड्रिगो, मार्काे एसेन्सियो र लुकास भास्क्वेजले समान एक गोल थपे । रियलले पहिलो हाफमै चार गोल गर्दा दोस्रो हाफमा दुई गोल गर्न सफल भयो । रियलले पहिलो हाफमा १५ मिनेटको अन्तरमा चार गोल गर्दै खेललाई पुर्ण रुपमा आफ्नो पकडमा राख्न सफल भएको थियो ।
सान्टियागो बर्नबेउमा आइतबार राति भएको खेलको २२औं मिनेटमा रोड्रिगोको गोलबाट रियलले गोलको खाता खोलेको थियो । उनले मार्काे एसेन्सियोको पासमा गोल गर्न सफल भएका थिए ।
त्यसपछि कप्तान बेन्जेमाले ८ मिनेटको अन्तरमा ह्याट्रिक पूरा गर्दै रियललाई पहिलो हाफमा ४–० ले अघि बढाए । २९औं मिनेटमा भिनिसियस जुनियरको पासमा पहिलो गोल गरेका बेन्जेमाले ३२औं मिनेटमा भिनिसियसकै पासमा व्यक्तिगत दोस्रो र टोलीका लागि तेस्रो गोल गरे । ३६औं मिनेटमा रोड्रिगोको पासमा बेन्जेमाले ह्याट्रिक पूरा गरे ।
६५औं मिनेटमा रोड्रिगोले गोल गरेपनि भिएआरबाट मान्यता पाएन । ७३औं मिनेटमा मार्काे एसेन्सियोले गोल गर्दै रियललाई ५–० ले अघि बढाए । उनले रोड्रिगोको पासलाई सदुपयोग गरेका थिए ।
त्यसपछि इन्ज्युरी समयको थप गरिएको पहिलो मिनेटमा लुकास भास्क्वेजले परिवर्तित खेलाडी इडेन हाजार्डको पासमा गोल गर्दै रियललाई ६–० को सानदार जित दिलाए ।
यस फराकिलो जितसँगै रियलले शीर्षस्थानको बार्सिलोनासँगको अंक दुरी १२ म छोट्याएको छ । दोस्रो स्थानमा रहेको रियलको २७ खेलबाट ५९ अंक पुगेको छ । समान खेलबार्ट शीर्षस्थानको बार्सिलोनाको ७१ अंक छ । पराजित रियल भालाडोलिड २८ अंक जोडेर १६औं स्थानमा छ ।
