सन् २०२१ को अगस्टमा अर्जेन्टिनाका स्टार फुटबलर लियोनल मेस्सीले स्पेनिस क्लब बार्सिलोना छाडेर पीएसजी गएका थिए । मेस्सी बार्सिलोनामा आवद्ध हुँदा १६ वर्षका थिए । त्यही नै उनले सिनियर करियर सुरु गरेका मेस्सीले १८ वर्षपछि बार्सिलोनालाई ‘गुडबाइ’ गरे ।
बार्सिलोनामा रहँदा धेरै समर्थक कमाएका मेस्सी भावुक हुँदै जसरी क्लबबाट टाढा भए त्यसरी नै उनका समर्थकहरु पनि निराश भएका थिए । त्यतिबेला उनी के कति कारणले बार्सिलोना छाडे भन्ने चर्चाहरु सतहमा आए पनि अहिले स्पेनिस अखबारले मेस्सीले बार्सिलोना बस्नका लागि ९ सर्त राखेको र त्यो पूरा नभएपछि क्लबसँग सम्बन्ध विच्छेद गरेको दावी गरेको छ ।
स्पेनिस अखबार एल मुन्डोले गरेको दावी अनुसार मेस्सीले क्लबसँगको सम्झौताका लागि प्राइभेट प्लेनदेखि फि बढाउनु पर्ने लगाएतका सर्त राखेका थिए । तर त्यतिबेला बार्सिलोनाको आर्थिक अवस्था नाजुक हुँदा मेस्सीका मागहरु पूरा गर्न सकेन ।
एल मुन्डोले दावी गरेका सर्तहरु यस प्रकार छन् ।
१. सम्झौता बढाउन : क्लबले मेस्सीसँग ३ वर्षको सम्झौता गर्नु पर्ने थियो ।
२. नविकरणका लागि धेरै फी : सम्झौता नवीकरणका लागि मेस्सीले १० मिलियन यूरो मागेका थिए । जुन मेस्सीको बार्षिक पाउने भन्दा छुट्टै थियो ।
३. रिलज क्लजको पैसा कम : बार्सिलोना छोड्नु पर्दा रिलिज क्लबका लागि १० हजार युरोमात्रै राख्न माग गरेका थिए । बार्सिलोनाले पहिलो सम्झौतामा यो रकम ७०० मिलियन यूरो राखेको थियो । अर्थात मेस्सीले सम्झौता तोडेको खण्डमा उनले क्लबलाई दिनु पर्ने थियो । यो रकम घटाएर जम्मा १० हजार युरो बनाउन मेस्सीले माग गरेका थिए ।
४. कटौती भएको रकम फिर्ता : कोभिड १९ का कारण बार्सिलोनाले मेस्सीसहित अन्य खेलाडीको फी कटौती गरेको थियो । मेस्सीले क्लबमा यदि बस्ने हो भने विगतमा कटौती गरेको फी को ३ प्रतिशत व्याज जोडेर फिर्ता दिनुपर्ने सर्त राखेका थिए ।
५. निजी विमान प्रयोग : मेस्सी र उनको परिवारले क्रिसमस छुट्टी मनाउन अर्जेन्टिना जाने र आउनका लागि क्लबले निजी विमानको व्यवस्था गर्नुपर्ने माग राखेका थिए ।
६. निजी बक्स : बार्सिलोनाको होम ग्राउन्डमा मेस्सी र अर्का खेलाडी लुईस सुवारेजको परिवारलाई निजी बक्स दिनुपर्ने र त्यो बक्समा उनीहरु बसेर म्याच हेर्न पाउनु पर्ने व्यवस्था गर्नुपर्ने सर्त थियो ।
७. कर क्लबले तिर्नुपर्ने : यदि स्पेनिस सरकारले आयकर बढाएमा मेस्सीलाई दिने फी क्लबले बढाउनु पर्ने र बढेको कर तिर्दा मेस्सीले आफूलाई कुनै पनि फी कम नहुने गरि सम्झौता गर्नुपर्ने सर्त राखेका थिए ।
८. निजी असिस्टेन्ट राख्न पाउनु पर्ने : मेस्सीले बार्सिलोनामा आफ्नै हिसाबवले निजी असिस्टेन्ट राखेका थिए । उनको नाम पेपे कोस्टा थियो । कोस्टाको पारिश्रमिक मेस्सीले नभइ बार्सिलोना क्लबले तिर्दै आएको थियो । तर कोभिड १९ का कारण निजी असिस्टेन्ट हटाएर क्लबको आर्थिक सुधार गर्ने अभियानमा बार्सिलोना रहेको थियो । तर यस्तोमा मेस्सीले कोस्टालाई निरन्तरता दिनुपर्ने सर्त राखेका थिए ।
९. भाइलाई कमिसन : मेस्सीका भाइ रोद्रिगोको कमिशन बढाउनु पर्ने शर्त थियो । रोद्रिगो फुटबल प्लेयर एजेन्ट पनि हुन् । उनी २०२०–२१ मा युवा खेलाडी अन्सु फाटीका एजेन्ट थिए ।
अखबारका अनुसार बार्सिलोना मेस्सीले राखेका ९ माग मध्य ७ वटा मागमा सहमत थियो । तर सम्झौता नविकरणका लागि १० मिलियन युरो र रिलिज क्लज ७०० मिलियन यूरो घटाएर १० हजार बनाउने विषयमा सहमति नभएको हो । यति भएपछि मेस्सीले पेरिस सेन्ट जर्मेइन (पीएसजी) क्लबमा आवद्ध भएका थिए ।
