नेपालले पहिलो पटक एकदिवसीय अन्तर्राष्ट्रियमा ३ अंकको रन अन्तरको हार बेहोरेको हो । टस हारेर ब्याटिङको निम्तो पाएपछि वेस्ट इन्डिजले ७ विकेट गुमाई ३ सय ३९ रन बनाएपछि नै नेपाललाई लक्ष्य भारी परिसकेको थियो । हरारे स्पोर्ट्स क्लबमा ४९.४ ओभरमा २ सय ३८ रनमा अलआउट भएपछि नेपालले रनको हिसाबमा एकदिवसीय अन्तर्राष्ट्रियकै सबैभन्दा ठूलो हार बेहारेको हो ।
नेपाल पहिलो खेलमा जिम्बावेसँग ८ विकेटले पराजित भयो । त्यसपछि अमेरिकामाथि नेपालले ६ विकेटको विजय पाएको थियो । लगातार तेस्रो हारपछि अमेरिका विश्वकप छनोटको समूह चरणबाटै बाहिरिने पहिलो राष्ट्र बनेको छ ।
वेस्ट इन्डिजको तीव्र बलिङसामु नेपाल सुरुआतदेखि नै दबिएर खेलेको थियो । कुशल भुर्तेललाई ५ रनमै अल्जारी जोसेफबाट बोल्ड भए । भीम सार्की स्कुप हान्ने चक्करमा २ रनमा छँदै जेसन होल्डरको बलमा आउट भए । ओपनर आसिफ शेखले २८ रन बनाए । उनले ३६ बल खेल्दै ३ चौका प्रहार गरेका थिए । कप्तान रोहित पौडेलले ३० रन जोडे । उनले ४३ बलमा ३ चौका प्रहार गरे । कुशल मल्ल २ रनमै आउट भए ।
आसिफले ६३ रन जोडे । एकदिवसीय अन्तर्राष्ट्रियमा यो उनको छैटौं अर्धशतक हो । उनले ९३ बल खेल्दै ४ चौका र १ छक्का प्रहार गरे । करण केसी आउट हुने अन्तिम खेलाडी थिए । उनले २७ बल खेल्दै ४ चौका र १ छक्कासहित २८ रन जोडेका थिए । ललित राजवंशी १ बल खेले, रनविहीन अविजित रहे ।
वेस्ट इन्डिजका लागि होल्डरले ३ विकेट लिए । उनले १० ओभरमा ३४ रनमात्र खर्चे । जोसेफले १० ओभरमा ४५, अकिल होसेनले १० ओभरमा १ मेडन राख्दै ४९ र किमो पाउलले १० ओभरमा १ मेडन राख्दै ६३ रन खर्चेर २–२ विकेट लिए ।
यसअघि नेपालले टस जितेपछि ब्याटिङको निम्तो पाएको वेस्ट इन्डिजले निर्धारित ५० ओभरमा ७ विकेट गुमाई ३ सय ३९ रन बनाएको थियो । कप्तान साई होप र निकोलस पुरनले सानदार शतक बनाएपछि वेस्ट इन्डिजले विशाल स्कोर बनाएको थियो । यी दुईले चौथो विकेटमा २ सय १६ रनको साझेदारी गरेका थिए ।
पुरनले १ सय १५ र होपले १ सय ३२ रन बनाए । एकदिवसीय अन्तर्राष्ट्रियमा पुरनको यो दोस्रो र होपको १६ औं शतक हो । ९४ बल खेलेका पुरनले १० चौका र ४ छक्का प्रहार गरे । उनले ३ र ५३ रनमा जीवनदान पाएका थिए । दुवै पटक आसिफले उनको क्याच फुत्काउन पुगेका थिए । दीपेन्द्रले आफ्नै बलमा सानदार क्याच लिई पुरनलाई आउट गरेपछि बलियो साझेदारी तोडिएको थियो ।
होपले १ सय २९ बल खेल्दै १२ चौका र ३ छक्का प्रहार गरे । रोभमन पावेल १४ बलमा २९ र किमो पाउल १ रनमा आउट भए । जेसन होल्डर १० बलमा २ चौकासहित १६ रनमा अविजित रहे । यसअघि नेपालले बलिङमा सानदार सुरुआत गरेको थियो । करणले नेपालको दोस्रो तथा आफ्नो पहिलो ओभरमै केयल मेयर्सलाई कुशलको हातबाट सानदार क्याच गराएका थिए । पाँचौं ओभरमा जोन्सन चार्ल्सलाई गुलशनले शून्यमा आउट गरेका थिए ।
ब्रेन्डन किङलाई ३२ रनमा सन्दीपले बोल्ड गरेपछि वेस्ट इन्डिज १६ औं ओभरमा ५५–३ को स्थितिमा पुगेको थियो । नेपालबाट ललितले ३ विकेट लिए । खेलको पहिलो ओभर लिएर आएका उनले १० ओभरमा ५२ रन खर्चे । करण, गुलशन, सन्दीप र दीपेन्द्रको नाममा १–१ विकेट रह्यो ।
करण महँगा
- वेस्ट इन्डिजले नेपालविरुद्ध एकदिवसीय अन्तर्राष्ट्रियमा सबैभन्दा बढी रन बनाउने कीर्तिमान बनाएको छ । वेस्ट इन्डिजले ३३९–७ को स्कोर बनाएको थियो । मार्चमा यूएईले विश्वकप लिग २ को खेलमा नेपालविरुद्ध कीर्तिपुरमा ३१०–६ को स्कोर बनाएको थियो ।
- करण केसीले वेस्ट इन्डिजविरुद्ध १० ओभरमा ८१ रन खर्चेका थिए । नेपाली बलरले एकदिवसीय अन्तर्राष्ट्रियमा सबैभन्दा बढी रन खर्चेको नकारात्मक कीर्तिमान करणले बराबरी गरेका छन् । गत वर्ष पपुवा न्युगिनीविरुद्ध सोमपाल कामीले कीर्तिपुरमा ९ ओभरमा८१ रन नै खर्चेका थिए ।
- वेस्ट इन्डिजसँग भोगेको १ सय १ रनको हार एकदिवसीय अन्तर्राष्ट्रियमा रन अन्तरको हिसाबमा नेपालको सबभन्दा ठूलो हार हो । गत वर्ष लिग २ मा यूएईविरुद्ध दुबईमा भोगेको ९९ रनको हार यसअघिको ठूलो थियो । उक्त खेलमा २ सय ३ रनको लक्ष्य लिएर आएको नेपाल १ सय ३ रनमा अलआउट भएको थियो ।
