नेपाल एएफसी यू २० एसियन कप छनोटबाट बाहिर भएको छ ।
गएराति भएको खेलमा घरेलुटोली बहराइनसँग ६–० गोलको फराकिलो अन्तरले पराजित भएको नेपालले अर्को वर्ष हुने एसियन कपमा पुग्ने सबै सम्भावना पनि गुमाएको छ । लगातार तीन खेलमा पराजित भएको नेपालले अब एउटा मात्रै खेल खेल्न बाँकी छ ।
शेख अलि बिन मोहमद अल खालिफा स्टेडियममा घरेलु टोली बहराइनलाई जिताउन अब्दुल्ला अली अल्सुबाईले दुई तथा कप्तान अब्दुल्लाह सुल्तान अल्खालासी, सायद अली नसिर, अब्दुलरहमान गडबन र मुबारक मोहमद हाबिबले एक एक गोल गरेका थिए ।
२०औं मिनेटमा अब्दुल्लाहले पेनाल्टीमा गोल गर्दै बहराइनलाई सुरुआती अग्रता दिलाएका थिए । नेपालमा सुमित श्रेष्ठ पेनाल्टी एरियामा ह्याण्ड गरेपछि बहराइनले पाएको पेनाल्टीलाई गोलमा परिणत गरेको थियो । २८औं मिनेटमा अमर श्रेष्ठले रातो कार्ड पाएपछि नेपाल पहिलो हाफमै १० खेलाडीमा झरेपछि झनै दबावमा आएको थियो ।
४२औं मिनेटमा नसिरले गोल गर्दै बहराइनको अग्रता दोब्बर पारे ।
६७औं मिनेटमा अब्दुलरहमानले गोल गरेपछि बहराइन ३–० ले अघि बढेको थियो । लगातार गोल थप्दै गएको बहराइनले चौथो गोल ८३ औं मिनेटमा गरेको थियो । त्यतिबेला अब्दुल्लाले गोल गरेका थिए ।
८८औं मिनेटमा अब्दुल्लाले व्यक्तिगत दोस्रो तथा टिमका लागि पाँचौं गोल गरे । ९०औं मिनेटमा मुबारकले गोल गर्दै बहराइनलाई ६–० को फराकिलो जीत दिलाए ।
समूह ‘बी’ मा बहराइनले पहिलो जित निकाल्दा २ खेलबाट ४ अंक जोडेको छ । पहिलो खेलमा नेपाल भुटानसँग र दोस्रो खेलमा कतारसँग नेपाल पराजित भएको थियो ।
नेपालले समूह चरणको अन्तिम खेलमा आइतबार बगलादेशसँग खेल्नेछ ।
