स्पेनिस मिडफिल्डर पेड्रीको गोलमा क्याटलान क्लब बार्सिलोनाले स्पेनिस ला लिगामा झिनो जित निकालेको छ ।
बार्सिलोनाले घरेलु टोली जिरोनालाई १–० ले पराजित गर्दै शीर्षस्थानमा बलियो पकड बनाएको छ । स्टाडि म्युनिसिपल डि मोन्टिलिभि जिरोनामा शनिबार राति भएको खेलमा बार्सिलोनाले घरेलु टोलीलाई दवावमा राखेपनि गोलको लागि दोस्रो हाफ नै कुर्नुपरेको थियो ।
१५औं मिनेटमा औसमाने डेम्वेलेले टाइट एंगलबाट गरेको प्रहारलाई गोलरक्षक पाउलो गाजानिगाले मुस्किलले बचाए । ६४औं मिनेटमा पेड्रीले गोल गर्दै बार्सिलोनालाई १–० को अग्रता दिलाए । उनले जोर्डी अल्वाको पासलाई सदुपयोग गरेका थिए ।
८६औं मिनेटमा जिरोना बराबरीबाट चुक्यो । इभान मार्टिनले सिक्स यार्ड बक्समा पाएको सुन्दर मौकालाई खेर फाले । खेलको अन्त्यतिर जिरोनाका प्रशिक्षक मिचेल रातो कार्ड खाँदै टचलाइन छाड्न बाध्य भए ।
यस जितसँगै बार्सिलोनाले शीर्षस्थानमा ६ अंकको अग्रता बनाएको छ । बार्सिलोनाको १८ खेलबाट ४७ अंक जोडेको छ । एक खेल कम खेलेको रियल म्याड्रिडको ४१ अंक छ । पराजित जिरोना १९ खेलबाट २१ अंक जोडेर १२औं स्थानमा छ ।
ला लिगाकै अर्काे खेलमा अल्मेरियाले स्पान्योललाई ३–१, क्याडिजले मलोर्कालाई २–० र सेभियाले इल्चेलाई ३–० ले पराजित गरेको छ ।
