काठमाडौं (हाम्रो खेलकुद) – नेपाली राष्ट्रिय क्रिकेट टोलीका मुख्य प्रशिक्षक मनोज प्रभाकरले आफ्नो पहिलो लक्ष्य ओडिआई निरन्तरता दिने र त्यसपछि टेस्ट मान्यताका लागि हुने बताएका छन् । शनिबार साँझ नेपाल आइपुगेका प्रभाकरले त्रिभुवन विमानस्थलमा पत्रकारसँग कुराकानी गर्नेक्रममा उक्त प्रतिक्रिया दिएका हुन् ।
‘यो मेरा लागि धेरै चुनौतीपूर्ण हुनेछ र म त्यसका लागि तयार छु । म युवा खेलाडीलाई सहयोग गर्नेछु । आफ्नो उत्कृष्ट दिन ध्यान केन्द्रित हुनेछ’, प्रभाकरले नेपाल आएपछि भने । त्यसैमा थपे, ‘मेरो लागि अन्तर्राष्ट्रिय स्तरमा टिम निर्माण गर्नु चुनौतीपूर्ण हुनेछ ।’
नेपाल किन रोजको भन्ने प्रश्नमा उनले जवाफ दिए, ‘म आफैं हिमालबाट आएको छु । म यहाँ काम गर्न चाहन्छु । यहाँको शक्ति र क्षमता फरक हुन्छ । म उत्कृष्ट नतिजा दिनेछु’, उनले भने ।
पछिल्लो समय नेपालको प्रदर्शन भने त्यति राम्रो छैन । त्यसैले टोलीलाई लयमा फर्काउन उनलाई सहज हुने छैन । आफू अनुभवी हुँदा हाल रहेका समस्या समाधान गर्ने प्रभाकर बताउँछन् ।
‘अन्तर्राष्ट्रिय स्तरमा टिम निर्माणको चुनौती हो । मसँग अनुभव छ । युवा खेलाडीलाई कसरी सुधार गर्ने मलाई थाहा छ । उनीहरु सधैं संघर्ष गर्दै आएका छन् । यो सानो मानसिक कुरा हो । त्यो हामी ठिक गर्ने छौं । त्यसैले म यहाँ आएको छु । दुई तीन महिनामै उनीहरुमा फरक पाउनुनेछ’, प्रभाकरले भने ।
भारतीय पत्रकारबाट नेपाली क्रिकेट अझ थाहा पाएको उनी बताउँछन् । ‘मलाई नेपाली क्रिकेटबारे थाहा छ । भारतका पत्रकारबाट नेपाली क्रिकेट के हो भनेर मलाई सहयोग गरेका छन् । केहि खेलाडी आइपिएल खेलिसकेका छन् । मैले पछ्याउँदै आएको छु’, उनले भने ।
‘मसँग समय छ । विश्वमा नेपालको प्रर्दशन हेर्नेछु । मेरो लक्ष्य पहिला ओडिआई र त्यसपछि टेस्ट हुनेछ । मैले नेपालको खेल लाइभ नहरेपनि भिडियो हेरेर प्रदर्शन हेरेको छु’, उनले भने ।
त्यसैमा उनले थपे, ‘मैले नेपाली क्रिकेटमा ब्याटिङमा सहयोग गर्न चाहन्छु । बलर फरक तरिकाले तयार हुनेछन् । तपाई बोर्डमा राम्रो लक्ष्य दिनुहुन्छ भने त्यसै फरक हुनेछ । त्यसैले ब्याटिङ सुधारमा केन्द्रित हुनेछौं ।’
अघिल्लो महिना पुबुदु दासानायिकले राजीनामा दिएपछि नेपालले प्रभाकरलाई नियुक्त गरेको हो । ५९ वर्षीय प्रभाकारले भारतबाट ३९ टेस्ट, १ सय ३० ओडिआई, १ सय ५४ प्रथम श्रेणी र २ सय १४ लिष्ट ए खेलेका छन् ।
तीव्र गतिमा बलिङ गर्ने उनले तल्लोक्रममा राम्रो ब्याटिङ गरे । उनले सचिन तेन्दुलकरको साथ ओपनिङ पनि गरे । ओडिआईमा भने १९९४ मा नै शारजाहमा श्रीलंकाविरुद्ध डेब्यू गरेका थिए । प्रभाकरले सन् १९८७, १९९२ र १९९६ मा लगातार तीन विश्वकप खेलेका थिए । १९८७ को विश्वकपमा भारतलाई सेमिफाइनल सम्म पुर्याउन उनको प्रदर्शन सानदार थियो ।
१९९६ मा श्रीलंकाविरुद्ध विश्वकपमा खराब बलिङ गरेपछि उनको करिअरको पूर्णविराम लागेको थियो । त्यो समय विश्व क्रिकेटकै सर्वाधिक विष्फोटक ब्याटरको रुपमा चर्चित सनाथ जयसूर्याले तेस्रो ओभरमै प्रभाकरलाई २२ रन प्रहार गरेपछि उनको करिअर त्यहिँबाट सकिएको थियो ।
१९९० को दशकमा भारतका प्रभावशाली अलराउन्डरको छवी बनाएका प्रभाकरको करिअर एक खेलको प्रदर्शनले सकियो । प्रभाकर ओडिआई र टेस्ट दुबैमा बलिङ र ब्याटिङ दुबैमा ओपनिङ गर्ने खेलाडी हुन् । प्रभाकर कडा र तिखो बोली स्वभावका प्रशिक्षक मानिन्छन् । उनले २०१६ को टि२० विश्वकपमा अफगानिस्तानको बलिङ प्रशिक्षक थिए । भारतीय घरेलु क्रिकेटमा दिल्लीको बलिङ र राजस्थानको मुख्य प्रशिक्षकको रुपमा काम गरेका थिए ।
