एजेन्सी – ब्राजिली फरवार्ड नेयमार जुनियर चम्कँदा पेरिस सेन्ट जर्मेन (पिएसजी) ले फ्रेन्च लिग वानका सानदार जित दर्ता गरेको छ ।
पिएसजीले मोन्टपेलिएरमाथि ५–२ को सानदार जित दर्ता गरेको हो । पिएसजीको जितमा नेयमारले दुई गोल गर्दा केलियन एमबाप्पे र रेनाटो सान्चेजले समान एक गोल गरे । एक गोल उपहार पाएको थियो । मोन्ट पेलिएरका वावी खाज्री र इन्जो चाटोले गोल फर्काए ।
पार्क डेस प्रिन्सेसमा शनिबार राति भएको खेलका घरेलु टोली पिएसजीले २३औं मिनेटमा पेनाल्टीमार्फत अग्रता लिने अवसर पाएपनि एमबाप्पे चुक्दा पिएसजीले अग्रता लिन सकेन ।
३९औं मिनेटमा फलाए साकोले आत्मघाती गोल गरेपछि पिएसजीले खेलमा अग्रता लिन सफल भयो । ४३औं मिनेटमा नेयमारले पेनाल्टीमा गोल गर्दै पिएसजीको अग्रता दोब्बर पारे । ५१औं मिनेटमा नेयमारले व्यक्तिगत दोस्रो तथा टोलीका लागि तेस्रो गोल गरेपछि पिएसजी सहज जिततर्फ अग्रसर बन्यो ।
५८औं मिनेटमा वावी खाज्रीले गोल गर्दै खेललाई ३–१ को स्थितिमा ल्याए । ६९औं मिनेटमा एमबाप्पेले गोल गरेपछि पिएसजी खेलमा ४–१ ले अघि बढ्यो । ८५औं मिनेटमा नेयमारले गोल गरेपनि अफसाइड ठहरिदा गोलले मान्यता पाएन । ८८औं मिनेटमा नुनो मेन्डिसको पासमा रेनाटो सान्चेजले गोल गरेपछि पिएसजी खेलमा ५–१ ले अघि बढ्यो ।
त्यसपछि इन्ज्युरी समयको थप गरिएको दोस्रो मिनेटमा इन्जो चाटोले गोल गर्दै खेललाई ५–२ को स्थितिमा ल्याएपनि त्यसपछि थप गोल नहुँदा पिएसजी ३ अंक जोड्न सफल भयो ।
पिएसजीको यो लगातार दोस्रो जित हो । यसअघि पिएसजीले क्लेरमन्ट फुर्टलाई ५–० को भारी अन्तरले हराएको थियो । लगातार दोस्रो जितसँगै पिएसजी ६ अंक जोडेर शीर्षस्थानमा रहेको छ । पहिलो हार बेहोरेको मोन्टपेलिएर ३ अंक जोडेर आठौं स्थानमा रहेको छ ।
