ब्राजिली फरवार्ड नेयमार जुनियरको पेनाल्टी गोलमा पेरिस सेन्ट जर्मेन (पिएसजी) फ्रेन्च लिग वानमा हारबाट जोगिएको छ ।
पिएसजीले घरेलु मैदानमा मोनाकोसँग १–१ गोलको बराबरी खेलेको हो । मोनाकोका केभिन भोलान्डले गोल गरेका थिए । पार्क डेस प्रिन्सेसमा आइतबार राति भएको खेलको २०औं मिनेटमा केभिन भोलान्डको गोलबाट पिएसजी खेलमा पछि परेको थियो ।
उनले एलेक्सान्डर गोलोभिनको पासमा प्रेसनेल किमपेम्वे र मार्किन्हसलाई बिट गर्दै गोल गर्न सफल भएका थिए । पहिलो हाफको अन्त्यतिर लियोनेल मेस्सीको प्रहार गोलरक्षकले बचाउँदा रिवाउन्डमा केलियन एमबाप्पेको प्रहार पोस्टमा लागेर फर्कदा पिएसजी बराबरीबाट चुक्यो ।
एक गोलले पछि परेको पिएसजीले त्यसपछि मोनाकोमाथि लगातार दवाव सिर्जना गर्दै ६७ प्रतिशत बल पोसेसन राखेपनि गोलको लागि पेनाल्टीको साहरा लिनु परेको थियो । टोली लगातार फिनिसिङमा चुकिरहेको थियो । खेलाडी उत्पादनमा बलियो मानिने मोनाकोले पिएसजीलाई काउन्टर अट्याकमा समस्या दिइरहेको थियो ।
७०औं मिनेटमा नेयमारले पेनाल्टीमा गोल गर्दै खेललाई १–१ गोलको बराबरीमा ल्याए । मारिपानले पेनाल्टी बक्समा नेयमारलाई फउल गरेपछि रेफ्रीले भिएआरको सहायता लिदै पिएसजीलाई पेनाल्टी प्रदान गर्दा पेनाल्टीमा सरिक भएका नेयमार चुकेनन् ।
त्यसपछि थप गोल निस्कन नसक्दा पिएसजी बराबरीमा रोकिन बाध्य बन्यो । प्रशिक्षक क्रिस्टोफ गाल्टिएरले यस खेलमा यसै समरमा क्लबमा भित्रिएका रेनाटो सान्चेजलाई पनि डेब्यु गराए ।
नयाँ सिजनमा पिएसजीको यो पहिलो बराबरीको नतिजा हो । बराबरीपछि अपराजित रहेको पिएसजी ४ खेलबाट १० अंक जोडेर शीर्षस्थानमा रहेको छ । समान १० अंक नै रहेपनि मार्से र लेन्स गोलअन्तरमा पछि छ । मोनाको ५ अंक जोडेर १२औं स्थानमा छ ।
