ब्राजिली फरवार्ड नेयमार जुनियरको निर्णायक गोलमा पेरिस सेन्ट जर्मेन (पिएसजी) ले फ्रेन्च लिग वानमा अपराजित यात्रा कायम राख्ने क्रममा ब्रेस्टलाई पराजित गरेको छ ।
घरेलु मैदानमा पिएसजीले ब्रेस्टमाथि १–० को झिनो जित निकालेको हो । पिएसजीको जितमा पहिलो हाफमा नेयमारले गरेको गोल नै निर्णायक बन्यो । उनले ३०औं मिनेटमा लियोनेल मेस्सीको पासमा गोल गर्न सफल भएका थिए ।
जारी लिग वानमा नेयमारको यो सातौ खेलमा आठौं गोल हो । उनले ६ असिस्ट पनि दिइसकेका छन् । मेस्सीले पनि लिग वानमा ७ खेलमा ७ असिस्ट र ३ गाल गरिसकेका छन् । त्यसअघि २५औं मिनेटमा ब्रेस्टका क्रिस्टोफे हेरेले रातो कार्डबाट बचेका थिए ।
पाहुना टोलीमाथि लगातार दवाव बढाएपनि पिएसजीले त्यसपछि गोल थप्न सकेन । यस जितसँगै अपराजित रहेको पिएसजी ७ खेलबाट १९ अंक जोडेर शीर्षस्थानमा यथावत रहेको छ । समान १९ अंक नै रहेपनि मार्से गोल अन्तरमा दोस्रोमा छ ।
पराजित ब्रेस्ट ५ अंक जोडेर १७औं स्थानमा छ । लिग वानकै अर्काे खेलमा लेन्सले ट्रोएसलाई १–० ले तथा मार्सेले लिललाई २–१ ले हराएको छ ।
