इटालियन सिरी ‘ए’ मा नेपोलीले सिजनको पहिलो हार बेहोर्दा युभेन्टसकाे लगातार साताैं जित दर्ता गरेकाे छ ।
इन्टर मिलानसँग १–० ले पराजित भएपछि नेपोलीले सिरी ‘ए’ मा सिजनको पहिलो हार बेहोरेको हो । नेपोलीलाई पहिलो हार चखाउन दोस्रो हाफमा बोस्निया हर्जगोभिनाका फरवार्ड इडेन जेकोले गरेको गोल नै निर्णायक बन्यो ।
मिलानोमा बुधबार राति भएको प्रतिस्पर्धात्मक खेलमा उनले ५६औं मिनेटमा फेडरिको डिमार्काेको पासमा गोल गरेका थिए । त्यसपछि दुवै टोलीले गोलका केही अवसर सिर्जना गरेपनि थप गोल भने निस्कन सकेन ।
अगस्टमा फियोरेन्टिनासँग गोलरहित र सेप्टेम्वरमा लिसेसँग १–१ गोलको बराबरी खेलेको नेपोलीले त्यसअघि दुई जित र त्यसपछि ११ खेलमा जित निकालेको थियो ।
यस हारपछि नेपोलीले आफ्नो अग्रता थप मजवुच बनाउने अवसर गुमाएको छ । शीर्षस्थानमा रहेको नेपोलीको १६ खेलबाट ४१ अंक छ । नेपोलीले१३ जित, २ बराबरी र एक हारको नतिजा निकालेको छ ।
नेपोलीलाई हराएको इन्टर १६ खेलबाट ३३ अंक जोडेर चौथो स्थानमा रहेको छ । दोस्रोमा रहेको एसी मिलानको ३६ तथा तेस्रोमा रहेको युभेन्ट्सको ३४ अंक छ ।
यस्तै अर्काे खेलमा क्रेमोनेसेलाई १–० ले पराजित गर्दै युभेन्ट्सले सिरी ‘ए’ मा लगातार सार्ता जित दर्ता गरेको छ । प्रतिस्पर्धात्मक बनेको खेलको इन्ज्युरी समयको पहिलो मिनेटमा एर्काडिअस्ज मिलिकले फ्रिकिकमा सानदार गोल गर्दै युभेन्ट्सलाई महत्वपूर्ण ३ अंक दिलाए ।
युभेन्ट्स गत अक्टोवरमा एसी मिलानसँग २–० ले पराजित भएयता, अपराजित छ । युभेन्ट्सले त्यसपछिको सबै सात खेलमा जित निकालेको छ । यस जितसँगै युभेन्ट्स १६ खेलबाट ३४ अंक जोडेर तेस्रो स्थानमा यथावत् रहेको छ । पराजित क्रेमोेनेसे ७ अंक जोडेर १९औं स्थानमा छ ।
