नेदरल्यान्ड्स समूह ए को विजेता बन्दै फिफा विश्वकप कतार २०२२ को नकआउट चरणमा प्रवेश गरेको छ । समूहको अन्तिम खेलमा कतारलाई २-० ले हराउँदै नेदरल्यान्ड्स समूह चरणमा अपराजित रहयो ।
नेदरल्यान्ड्सविरुद्ध कतारले पछिल्ला खेलको तुलनामा सुधारिएको खेल प्रस्तुत गरेपनि गोल गर्न भने असफल रहयो । जवाफमा डच टोलीले कतारी डिफेन्समा कमजोरीको फाइदा उठाउँदै जित दर्ता गर्न सफल रहयो । पहिलो हाफको अन्त्यतिर अग्रता लिएको नेदरल्यान्ड्सले दोस्रो हाफको सुरुवातमा अग्रता दोब्बर पार्दै खेलमा अग्रता दोब्बर पारेको थियो ।
अल बेयत रंगशालामा मंगलबार तेस्रो मिनेटमा कतारका कप्तान हसान अलहेदोसले पेनाल्टी क्षेत्र बाहिरबाट गरेको प्रहार गोलरक्षक एन्द्रिज नोपर्टले सहजै बचाए । अर्कोतर्फ मेम्फिस डिपाएले पेनाल्टी क्षेत्र भित्रबाट गरेको प्रहार डिफेन्डरको भिडबाट छिर्दै कर्नर भएको थियो ।
खेलको २६ औं मिनेटमा कोडी गाक्पोले गोल गर्दै नेदरल्यान्ड्सलाई अग्रता दिलाए । मिडफिल्डबाट मेम्फिस डिपाएले सुरुवात गरेको आक्रमणलाई कोडी गाक्पोले फिनिस गरे । डिपाए, डेभि क्लासेन र गाक्पोले पास खेल्दै डिफेन्स चिरेपछि गोल सम्भव भएको थियो । गाक्पोले अन्तिम पासलाई पेनाल्टी क्षेत्रभित्र लग्दै वन भर्सेस वनमा सहज फिनिस गरे । विश्वकपमा उनको यो तेस्रो गोल हो ।
खेलमा पछि परेको अर्को मिनेटमै कतारका मोहमद इस्माइलको प्रहार नोपर्टले दोस्रो प्रयासमा बचाए । इन्ज्युरी समयमा डिपाएले पेनाल्टी क्षेत्र बाहिरबाट गरेको प्रहारले पोस्टको दिशा लिन सकेन ।
दोस्रो हाफको सुरुवातमै नेदरल्यान्ड्सले अग्रता दोब्बर पार्यो । फ्रेन्की डे जोङले ४८ औं मिनेटमा कतारी डिफेन्सको गल्तीमा गोल थपेका थिए । डिपाएको पहिलो प्रहारलाई गोलरक्षक मेशाल बार्शामले बचाएपनि पेड्रो मिगुएलले क्लियर गर्न ढिलो गर्दा डे जोङले रिबाउन्डलाई गोललाइन अघिबाट गोलमा परिणत गरे ।
६८ औं मिनेटमा नेदरल्यान्ड्सले गोल फर्काएपनि भिडियो असिस्टेन्ट रेफ्रीले त्यसलाई मान्यता दिएन । भिन्सेन्ट जान्सनको पासमा स्टिभन बर्घिअसले खाली पोस्टमा गोल गरेपनि उक्त मुभ बनाउने क्रममा गाक्पोको ह्यान्ड देखिएपछि गोलले मान्यता पाएन । इन्ज्युरी समयमा स्टिभन बर्घिअसको प्रहार क्रसबारमा लागेर फर्कंदा डच टोलीको अग्रता २-० मै सिमित रह्यो ।
नेदरल्यान्ड्सले ३ खेलमा ७ अंक जोड्दै अंक तालिकामा शीर्षस्थान हासिल गर्यो । कतार अंकविहिन रहँदै तालिकाको पुछारमा रहयो । समूहको अन्तिम खेलमा सेनेगलले इक्वेडरलाई हराउँदै नकआउट चरणमा प्रवेश गर्यो । सेनेगलले ३ खेलमा २ जितसहित ६ अंक जोड्दै दोस्रो स्थान हासिल गर्यो । इक्वेडर ४ अंकसहित तेस्रो स्थानमा सिमित रह्यो ।
