इन्ज्युरी समयमा लियोनार्दाे बोनुचीले गोल गरेपछि युभेन्ट्स इटालियन सिरी ‘ए’ मा हारबाट जोगिएको छ । दुई गोलले पछि रहेको युभेन्ट्सले सालेरनिटानासँग २–२ गोलको बराबरी खेलेको हो ।
एलिएन्ज एरिना टोरिनोमा आइतबार राति भएको खेलमा सालेरनिटानाका एन्टोनियो क्यानड्रेभा र क्रिस्टोफ पियाटिकले गोल गर्दा युभेन्ट्सका ग्लेइसन ब्रेमेर र बोनुचीले बराबरी गोल फर्काए ।
खेलको १८औं मिनेटमा एन्टोनियो क्यानड्रेभाले गोल गर्दै सालेरनिटानालाई सुरुवाती अग्रता दिलाए । पहिलो हाफको इन्ज्युरी समयको थप गरिएको पाँचौ मिनेटमा क्रिस्टोफ पियाटिकले गोल गर्दै सालेरनिटानाको अग्रता दोब्बर पारे ।
५१औं मिनेटमा ग्लेइसन ब्रेमेरले गोल गर्दै युभेन्ट्सलाई खेलमा फर्काउने संकेत दिए । त्यसपछि इन्ज्युरी समयको थप गरिएको तेस्रो मिनेटमा युभेन्ट्सले पेनाल्टी पाएपनि बोनुचीले गोल गर्न सकेनन् ।
तर, रिवाउन्डमा गोल गर्दै युभेन्ट्सलाई हारबाट जोगाए । इन्ज्युरी समयको पाँचौं मिनेटमा एर्काडिअस्ज मिलिकले गोल गरेपनि भिएआरबाट मान्यता नपाउँदा युभेन्ट्स जितबाट वञ्चित बन्यो ।
खेलको अन्त्यतिर रातो कार्डको वर्षा हुँदा युभेन्ट्सका प्रशिक्षक मासिमिलियानो एलेग्रीसहित दुई खेलाडीले तथा सालेरनिटाना१० खेलाडीमा समेटिएको थियो । युभेन्ट्सका एर्काडिअस्ज मिलिक र जुआन कोर्डाडो रातो कार्ड खाँदै मैदानबाट बाहिरिएका थिए । सालेरनिटानाका फेडरिको फाजियोले सिधै रातो कार्ड पाए ।
यो बराबरीसँगै युभेन्ट्स ६ खेलबाट १० अंक जोडेर आठौं स्थानमा रहेको छ । सालेरनिटाना ७ अंक जोडेर १०औं स्थानमा रहेको छ । युभेन्ट्स शीर्षस्थानको नेपोली, एटलान्टा र एसी मिलानसँग ४ अंकले पछि छ ।
