डेनमार्कमाथि जित निकाल्दै क्रोएसिया युइएफए नेसन्स लिग ए ग्रुप १ मा शीर्षस्थानमा उक्लिएको छ ।क्रोएसियाले डेनमार्कलाई २–१ ले हराएर शीर्षस्थानमा उक्लन सफल भएको हो ।
घरेलु टोलीको जितमा बोरना सोसा र लोभरको माजेरले गोल गरे । डेनमार्कका क्रिस्टियन एरिक्सनले एक गोल फर्काए ।माकसिमिर रंगशाला जाग्रिवमा बिहीबार राति भएको खेलको ४९औं मिनेटमा बोरना सोसाले गोल गर्दै क्रोएसियालाई सुरुवाती अग्रता दिलाए ।
७७औं मिनेटमा क्रिस्टियन एरिक्सनले गोल गर्दै खेललाई १–१ गोलको बराबरीमा ल्याए । त्यसको दुई मिनेटपछि लोभरको माजेरले गोल गर्दै क्रोएसियालाई २–१ को अग्रता दिलाए । त्यसपछि थप गोल निस्कन नसक्दा क्रोएसिया विजयी हुन सफल भयो ।
यस जितसँगै क्रोएसिया ५ खेलबाट १० अंक जोडेर शीर्षस्थानमा उक्लिएको छ । पराजित डेनमार्क ९ अंक जोडेर दोस्रो स्थानमा झरेको छ ।
यही समूहको अर्काे खेलमा फ्रान्सले अष्ट्रियालाई २–० ले पराजित गर्दै पहिलो जित निकालेको छ । फ्रान्सको जितमा केलियन एमबाप्पे र ओलिभर जिरुडले गोल गरे ।
यस जितसँगै फ्रान्स ५ खेलबाट ५ अंक जोडेर तेस्रो स्थानमा उक्लिएको छ । पराजित अष्ट्रिया ४ अंक जोडेर पुछारमा छ ।
