जर्मन ‘डेर क्लासिकेर’ मा बोरुसिया डर्टमुन्डलाई पराजित गर्दै बायर्न म्युनिख जर्मन बुन्डेसलिगाको शीर्षस्थानमा उक्लिएको छ ।
घरेलु मैदानमा डर्टमुन्डलाई ४–२ ले पराजित गर्दै बायर्न शीर्षस्थानमा फर्किएको हो । बायर्नको जितमा थोमस मुलरले दुई तथा किङ्सले कोमानले एक गोल गरे । एक गोल उपहार पाएको थियो । डर्टमुन्डका इम्री क्यान र डोनेल मालेनले गोल फर्काए ।
एलिएन्ज एरिना म्युनिखमा शनिबार राति भएको खेलको १३औं मिनेटमा गोलरक्षक ग्रेगर कोवेलको आत्मघाती गोलबाट बायर्नले अग्रता लिन सफल भएको थियो । १८औं मिनेटमा थोमस मुलरले गोल गर्दै बायर्नको अग्रता दोब्बर पारे । उनले म्याथिज डे लेग्टको पासमा गोल गर्न सफल भएका थिए ।
२३औं मिनेटमा मुलरले व्यक्तिगत दोस्रो तथा टोलीका लागि तेस्रो गोल गरेपछि बायर्न सहज जिततर्फ अग्रसर बन्यो । बायर्न यतिमै रोकिएन । ५०औं मिनेटमा किङ्सले कोमानले गोल गर्दै बायर्नलाई ४–० ले अघि बढाए । उनले लिरोए सानेको पासमा गोल गर्न सफल भएका थिए ।
त्यसपछि पाहुना टोली डर्टमुन्डले दुई गोल थपेपनि जितको लागि पर्याीत भएन । ७२औं मिनेटमा इम्री क्यानले पेनाल्टीमा गोल गर्दै खेललाई ४–१ को स्थितिमा ल्याए ।
इन्ज्युरी समयमा डोनेल मालेनले राफयल गुरेइरोको पासमा गोल गर्दै खेललाई ४–२ को स्थितिमा ल्याएपनि टोलीको हार टार्न सकेन । यस हारसँगै डर्टमुन्डले आफ्नो शीर्षतासमेत गुमाएको छ ।
प्रशिक्षक थोम टुचेलले आफ्नो पहिलो प्रशिक्षणको पहिलो खेलमा नै जित दर्ता गर्न सफल भएको छ । जुलियन नागेल्समनको स्थान लिएका टुचेलले आफ्नो पुर्व क्लब डर्टमुन्डलाई हराउन सफल भएको हो ।
शीर्षस्थानमा उक्लिएको बायर्नको २६ खेलबाट ५५ अंक पुगेको छ । समान खेलबाटै दोस्रो स्थानमा झरेको डर्टमुन्डको ५३ अंक छ ।
