जर्मन बुन्डेसलिगामा बोरुसिया डर्टमुण्डले सानदार जित दर्ता गरेको छ । घरेलु मैदानमा डर्टमुण्डले १० खेलाडीमा समेटिएको फ्रेइवर्गलाई ५–१ को भारी गोल अन्तरले पराजित गरेको हो ।
सिग्नल इडुना पार्कमा शनिबार राति भएको खेलमा डर्टमुण्डको जितमा निको स्लाटरबेक, करिम एडियमी, सेवास्टिन हालेर, जुलियन ब्रान्ड्ट र जियोभानी रेनाले गोल गरे । फ्रेइवर्गका लुकास होलेरले एक गोल फर्काए ।
खेलको १७औं मिनेटमा नै पाहुना टोली १० खेलाडीमा समेटिन पुगेको थियो । किलिएन सिलडिया दोहोरो पहेँलो कार्ड खाँदै मैदानबाट बाहिरिए । २६औं मिनेटमा निको स्लाटरबेकले गोल गर्दै डर्टमुण्डलाई १–० को अग्रता दिलाए ।
४५औं मिनेटमा लुकास होलेरले गोल गर्दै खेललाई १–१ गोलको बराबरीमा ल्याए । दोस्रो हाफमा भने डर्टमुण्डले खेलमा पकड जमाउँदै चार गोल थप्न सफल भयो ।
४८औं मिनेटमा करिम एडियमीले गोल गर्दै डर्टमुण्डलाई खेलमा २–१ ले अघि बढाए । उनले जुड बेलिङहमको पासमा गोल गर्न सफल भएका थिए ।
५१औं मिनेटमा सेवास्टिन हालेरले गोल गरेपछि डर्टमुण्ड सहज जिततर्फ अग्रसर बन्यो । टेस्टिकुल क्यान्सरबाट निको भएपछि तीन साताअघि खेलमा फर्किएका वेस्ट ह्याम युनाइटेडका पुर्व फरवार्डले पहिलो गोल गर्न सफल भएका हुन् ।
एर्लिङ ब्राउट हालान्डको प्रतिस्थापनको रुमा डर्टमुण्डले अनुबन्ध गरेको केही दिनपछि नै उनलाई क्यान्सर पुष्टि भएको थियो । त्यसपछि उनको दुई शल्यक्रिया गरिएको थियो । २८ वर्षीय हालेरको गत नोभेम्वरमा चार राउण्ड केमो थेरापी र शल्यक्रिया गरिएको छ ।
‘म पहिलो दिनदेखि नै यो क्षणको लागि पर्खिरहेको छु । जब मैले गोल गरें, सम्पूर्ण स्टेडियममा आगो लागेको जस्तो लाग्यो ।’ हालेरले भने, ‘म खुसी छु, तर बाटो अझै लामो छ, त्यसैले हामी हिँडिरहनेछौं र थप लक्ष्यहरूको लागि आशा राख्नेछौं ।’
हालेर जनवरी २२ मा अग्सबर्गविरुद्धको घरेलु लिगमा ४–३ को जित निकालेको खेलबाट मैदान फर्किएका थिए । ६९औं मिनेटमा जुलियन ब्रान्ड्टले गोल गरेपछि डर्टमुण्ड खेलमा ४–१ ले अघि बढ्यो ।
७७औं मिनेटमा फ्रेइवर्गका प्रशिक्षक क्रिस्टियन दोहोरो पहेलो कार्डसहित रातो कार्ड खाएर टचलाइन छाड्न बाध्य बने । ८२औं मिनेटमा जियोभानी रेनाले गोल गर्दै डर्टमुण्डलाई ५–१ को सानदार जित दिलाए ।
यस जितसँगै डर्टमुण्ड १९ खेलबाट ३७ अंक जोडेर तेस्रो स्थानमा उक्लिएको छ । पराजित फ्रेइवर्ग ३४ अंक जोडेर छैटौं स्थनमा छ ।
