स्विस भेट्रान टेनिस स्टार रोजर फेडेररले व्यवसायिक टेनिस खेल जीवनबाट सन्यास लिने घोषणा गरेका छन् । फेडेररले यसै साता लेभर कपपछि टेनिस खेल जीवनबाट सन्यास लिने घोषणा गरेका हुन् ।
अब फेडेररको बिदाई खेल अर्को साता लन्डनमा हुने लेभर कपमा हुनेछ । यो उनको व्यवस्थापन कम्पनीद्वारा सञ्चालित प्रतियोगिता हो । ‘मेरो शरीरले मलाई हालै स्पष्ट सन्देश दिएको छ । मैले २४ वर्षमा १५०० भन्दा बढी खेल खेलेको छु । अब मैले मेरो प्रतिस्पर्धी करियरको अन्त्य गर्ने समय हो भनेर बुझ्नुपर्छ ।’ फेडेररले भने, ‘टेनिस म तिमीलाई माया गर्छु र तिमीलाई कहिल्यै छोड्ने छैन ।’
२० पटकको ग्रान्डस्लाम विजेता ४१ वर्षीय फेडेररको सन्यासको घोषणासँगै टेनिसमा एक युगको अन्त्यको संकेत गरेको छ । चोटका कारण फेडेररले २०२१ को जुलाईमा भएको विम्बल्डन टेनिसपछि खेलेका छैनन् । तर उनी यस जुलाईमा अल इंग्ल्याण्ड क्लबमा सेन्टर कोर्टको १०० वर्षको वार्षिकोत्सवको अवसरमा आयोजित कार्यक्रममा देखा परेका थिए ।
पाँच सिजन लगातार शीर्ष वरियतामा रहेका फेडेररले राफयल नाडाल र नोभाक जोकोभिचसँग पुरुष टेनिसको स्वर्णिम युग बिताएका छन् ।
उनको सर्भिङ, फोरह्यान्ड, फुटवर्क र आक्रमण गर्ने शैली सबै याद रहनेछन् । उनका प्रतिद्वन्द्वी ३६ वर्षीय नाडाल र ३५ वर्षीय जोकोभिचसँगको खेलहरू पनि अविस्मरणीय थिए, जसले दुवैले बराबरी गरे । नाडाल २२ ग्रान्डस्लामसहित शीर्षमा रहँदा जोकोभिचले २१ ग्रान्डस्लाम उपाधि जितेका छन् ।
सन् १९९८ मा व्यवसायिक टेनिसमा १६ वर्षको उमेरममा डेब्यु गरेका फेडेररले पहिलोपटक २००३ मा ग्रान्डस्लाम उपाधि विम्बल्डन टेनिस जितेका थिए । फेडेररले ८ विम्बल्डन, ६ अष्ट्रेलियन ओपन, ५ यूएस ओपन र १ फ्रेन्च ओपन जितेका छन् ।
‘म धेरै भाग्यशाली थिए कि मैले यति धेरै खेल खेल्न पाए । म कहिल्यै बिर्सन सक्दिन ।’ फेडेररल भने, ‘हामीले एकअर्कालाई धक्का दियौं, र सँगै हामीले टेनिसलाई नयाँ स्तरमा पु¥यायौं ।’ फेडेरर आफ्नो अन्तिम खेलमा विम्बल्डनको क्वार्टरफाइनलमा हुबर्ट हुर्काजसँग ३–६ ६–७ र ०–६ ले पराजित भएका थिए । त्यसलगत्तै दाहिने घुँडाको मेनिस्कस र कार्टिलेजको चोटका कारण उनी लामो समय कोर्ट बाहिर रहे ।
फेडेररका श्रीमती मिर्का पनि टेनिस खेलाडी हुन् । उनीहरुको ओलम्पिक दौरान भेट भएको थियो । उनीहरुका दुई जुम्ल्याहा बच्चा छन् ।
