फिफा विश्वकप कतार २०२२ अन्तर्गत समूह ई को अन्तिम खेलमा जर्मनीले कोस्टारिकालाई पराजित गरेको छ । निकै रोमान्चक खेलमा एक समय पछि परेको जर्मनी ४-२ को जित दर्ता गर्न सफल रहयो । तर जितका बाबजुद जर्मनी समूह चरणबाट बाहिरियो ।
जर्मनीले पहिलो हाफमा खेल पूर्णत आफ्नो पकडमा राख्दै अग्रता लिएको थियो । दोस्रो हाफमा भने कोस्टारिकाले काउन्टर अट्याकमा प्राप्त अवसर लगातार सदुपयोग गर्दै अग्रता नै लियो । त्यसपछि आक्रामक परिवर्तन गर्दै दबाब थपेको जर्मनीले दुई गोल फर्काउन सफल रहयो । तर समूहको अर्को खेलमा अनुकुल नतिजा नआउँदा जर्मनीको जित नकआउट चरण पुग्न पर्याप्त रहेन ।
स्पेन जापानसँग २-१ ले पराजित भएपछि जर्मनी बाहिरिएको हो । यस नतिजासँगै जापान ६ अंकसहित समूहको शीर्षस्थानमा रहेर नकआउट चरण प्रवेश गरेको छ । स्पेन ४ अंक जोड्दै समूहको दोस्रो स्थानमा रहेर अन्तिम १६ मा स्थान बनाउन सफल रहयो । जर्मनी ४ अंक जोडेपनि गोल अन्तरमा स्पेनभन्दा पछि रहयो । स्पेनको गोल अन्तर +६ तथा जर्मनी +१ मा रहयो । कोस्टारिका ३ अंकका साथ चौथो हुँदै बाहिरियो ।
सातौं मिनेटमा जर्मनीका जमाल मुसियालाले पेनाल्टी क्षेत्रभित्र ५ डिफेन्डरलाई बिट गरेपनि प्रहार गर्ने अवसर पाएनन् । उनले दिएको अन्तिम पासमा थोमस मुलर र लिओन गोरेट्जका बलियो प्रहार गर्न चुके ।
दशौं मिनेटमा जर्मनीले सर्ज नाब्रीको गोलमा अग्रता लियो । डेविड रमको क्रसमा नाब्रीले गरेको हेडर गोलमा परिणत भएको थियो । १४ औं मिनेटमा गोरेट्जका को हेडरलाई कोस्टारिकाका कप्तान तथा गोलरक्षक केलर नाभासले विफल पारे ।
४० औं मिनेटमा लेरोय सानेले पेनाल्टी क्षेत्र भित्रबाट गरेको प्रहारमा नाभास बिट भएपनि बल पोस्टभन्दा थोरै परबाट गयो । ४२ औं मिनेटमा कोस्टारिकाले खेलमा फर्कने सुवर्ण अवसर खेर फाल्यो । जर्मन डिफेन्डरद्वय डेविड रम र एन्टोनियो रुडीगरले लगातार गल्ती गरेपछि केशर फुलरले वन भर्सेस वनको स्थितिमा गोल गर्न सकेनन् । उनको शक्तिशाली प्रहार गोलरक्षक म्यानुएल नोएरले पन्च गरिदिए ।
कोस्टारिकाले ५८ औं मिनेटमा येल्त्सिन तेजेदामार्फत बराबरी गोल फर्कायो । केशर फुल्लरको क्रसमा केन्डल वाटसनको हेडर म्यानुएल नोएरले रोके । तर उक्त रिबाउन्डमा तेजेदाले दुई डिफेन्डरको बिचमा जुधेर शक्तिशाली प्रहारमार्फत बललाई पोस्टभित्र पसाए ।
मुसियालाको प्रहार पोस्टमा लागेर फर्कंदा जर्मनीले पुन: अग्रता लिन सकेन । उक्त रिबाउन्डमा मुसियाला आफैं दोस्रो प्रहार गर्नबाट चुके । ६७ औं मिनेटमा मुसियालाको अर्को प्रहारमा पोस्ट बाधक बन्यो । पेनाल्टी क्षेत्र बाहिरबाट उनले गरेको प्रहारमा गोलरक्षक नाभास बिट भएपनि बल क्रसबारमा लागेर फर्कियो ।
७० औं मिनेटमा अप्रत्याशित अग्रता लियो । गोलरक्षक नोएरले अघि बढेर बल जोगाउन नसक्दा हुलमुलमा गोल सम्भव भएको थियो । जोहान भार्गासको अन्तिम प्रहार नोएरलाई लागेर फेरी उनैलाई लाग्दै गोल भएको थियो ।
७३ औं मिनेटमा काइ हाभर्ट्जले जर्मनीलाई पुन: बराबरीमा ल्याए । पेनाल्टी क्षेत्रभित्र डिफेन्स लाइन बिट गरेका उनले वन भर्सेस वनमा नाभासलाई बिट गर्दै गोल गरे । लगत्तै काउन्टर अट्याकमा जर्मनीले अग्रता लिने अवसर पाएको थियो । तर नाभासले फुलक्रुगको अन्तिम प्रहारमा बचाउ गर्दै जर्मनीलाई अघि बढ्न दिएनन् ।
८५ औं मिनेटमा जर्मनीले अग्रता लियो । हाभर्ट्जले व्यक्तिगत दोस्रो गोल गर्दै टोलीलाई अघि बढाए । उनले नाब्रीको क्रसमा फार पोस्टमा सहज फिनिस गरेका थिए । इन्ज्युरी समयको पहिलो मिनेटमा निकलस फुलक्रुगले गोल थपे । उनले लेरोय सानेको पासलाई सहजै गोलमा परिणत गरेका थिए ।
