लन्डन क्लब आर्सनलले अर्काे लन्डन क्लब चेल्सीका जर्मन मिडफिल्डर काई हाभर्टजलाई अनुबन्ध गर्ने पक्का भएकाे छ । आर्सनलले जर्मन मिडफिल्डर काईलाई ६५ मिलियन पाउन्डमा क्लबमा अनुबन्ध गर्न सफल भएको हो ।
सम्झौताको विषयमा दुई क्लब र काईबीच सहमति भइसकेको र केही दिनमा नै मेडिकलसँगै आर्सनलमा सार्वजनिक गरेका तयारी भइरहेको छ ।
गत सिजन चेल्सीका लागि ४७ खेलमा ९ गोल गरेका उनको एड अन शुल्क बढ्ने सम्भावना छ । २४ वर्षीय हाभर्ट्ज सन् २०२० मा जर्मन क्लब बायर लेभरकुसेनबाट ७१ मिलियन पाउण्डमा चेल्सीमा आएका थिए ।
काईले चेल्सीमा तीन सिजन बिताउँदा १३९ खेलमा ३२ गोल गरेका छन् । उनले २०२१ च्याम्पियन्स लिगको फाइनलमा म्यानचेस्टर सिटीविरुद्ध चेल्सीका लागि विजयी गोल पनि गरेका थिए ।
आर्सनल यो सिजन च्याम्पियन्स लिगमा छनोट भएसँगै प्रशिक्षक मिकेल अर्टेटाले आफ्नो टोलीलाई बलियो बनाइरहँदा हाभर्ट्ज आर्सनल जान तयार भएको हो ।
आर्सनलले वेस्ट ह्यामका इंग्लिस मिडफिल्डर डेक्लान राइसलाई पनि पछ्याइरहेको छ, तर २४ वर्षीय राइसले ९० मिलियन पाउण्डलाई पनि अस्वीकार गरेको छ ।
यसैबीच, चेल्सीले आफ्नो टोलीको आकार घटाउने प्रयास गरिरहेको छ । क्रोएसियाका २९ वर्षीय मिडफिल्डर माटियो कोभासिस अर्काे इंग्लिस क्लब म्यानचेस्टर सिटीमा ३० मिलियन पाउन्डमा सम्झौता हुने पक्का भइसकेको छ ।
चेल्सीकै अर्का ३२ वर्षीय फ्रान्सेली मिडफिल्डर एनगोलो कान्टे साउदी अरेबियाको च्याम्पियन अल इतिहादमा जाने पक्का भइसकेको छ ।
