ब्राजिली मिडफिल्डर क्यासमिरो चम्कँदा म्यानचेस्टर युनाइटेडले एफए कपको चौथो चरणमा च्याम्पियनसिप क्लब रिडिङलाई पराजित गरेको छ ।
युनाइटेडले घरेलु मैदानमा १० खेलाडीमा समेटिएको रिडिङलाई ३–१ ले पराजित गर्दै पाँचौं चरणमा प्रवेश गरेको छ ।युनाइटेडको जितमा क्यासमिरोले दुई तथा फ्रेडले एक गोल गरे । रिडिङका एमाडोउ सलिफ मवेंगेले एक गोल फर्काए । ओल्ड ट्राफोर्डमा शनिबार राति भएको खेलमा सबै चार गोल दोस्रो हाफमा भएको थियो ।
५४औं मिनेटमा क्यासमिरोले गोल गर्दै युनाइटेडलाई १–० को अग्रता दिलाए । उनले एन्टोनीको पासलाई सदुपयोग गरेका थिए ।त्यसको चार मिनेटपछि नै क्यासमिरोले फ्रेडको पासमा व्यक्तिगत र टोलीका लागि दोस्रो गोल गर्दै टोलीको अग्रता दोब्बर पारे ।
६५औं मिनेटमा रिडिङ १० खेलाडीमा समेटियो । एन्डी क्यारोल दोहोरो रातो कार्ड खाँदै मैदानबाट बाहिरिए । ६६औं मिनेटमा फ्रेडले गोल गर्दै युनाइटेडलाई ३–० ले अघि बढाए । उनले ब्रुनो फर्नान्डेसको पासमा गोल गर्न सफल भएका थिए ।
७२औं मिनेटमा एमाडोउ सलिफ मवेंगेले गोल गर्दै खेललाई ३–१ को स्थितिमा ल्याए । त्यसपछि थप गोल निस्कन नसक्दा युनाइटेड विजयी हुन सफल भयो ।
अन्य नतिजा
वालसलविरुद्ध लेस्टर (०–१)
एसरिङटनविरुद्ध लिड्स (१–३)
साउथह्याम्टनविरुद्ध ब्ल्याकपुल (२–१)
फुलहमविरुद्ध सन्डरल्याण्ड (१–१)
ब्रिस्टलविरुद्ध वेस्ट ब्रुम (३–०)
इप्सविचविरुद्ध बर्नले (०–०)
ब्ल्याकवर्नविरुद्ध बर्मिङहम (२–२)
सेफिल्ड वेनस्डेविरुद्ध फ्लिटवुड (१–१)
लुटनविरुद्ध ग्रिम्सबी (२–२)
प्रिस्टनविरुद्ध टोटेनहम (०–३)
