क्यानडालाई पेनाल्टीमा हराउँदै उरुग्वेले कोपा अमेरिकामा तेस्रोcस्थान हासिल गर्यो
उरुग्वेले कोपा अमेरिकामा तेस्रो स्थानमा रहेर प्रतियोगिताको अन्त्य गरेको छ। अमेरिकाको क्यारोलिनामा आइतबार विहान तेस्रो स्थानका लागि भएको खेलमा उरुग्वेले क्यानडालाई पेनाल्टी सुटआउटमा ४-३ गोल अन्तरले पराजित गरेको हो। सेमिफाइनलमा उरुग्वे कोलम्बियासँग र क्यानडा अर्जेन्टिनासँग पराजित भएपछि तेस्रो स्थानको भिडन्तमा उत्रिएका थिए।
निर्धारित ९० मिनेटको खेलमा दुवै टिमले दुई-दुई गोलको बराबरी खेलेपछि खेल पेनाल्टी सुटआउटमा गएको थियो। सुरुआती अग्रता उरुग्वेले लिए पनि अग्रता जोगाउन असफल भएको थियो। एक समय पछि परेको अवस्थामा अतिरिक्त समयका दोस्रो मिनेटमा लुईस सुवारेजले गोल गर्दै खेल पेनाल्टीमा लगेका थिए।
आठौं मिनेटमा रोड्रिगो बेन्टकुरले गोल गर्दै उरुग्वेलाई अग्रता दिलाएका थिए। २२ औं मिनेटमा क्यानडाका स्मेल कोनेले गोल गर्दै खेल एक-एक गोलको बराबरीमा ल्याएका थिए। ८० औं मिनेटमा क्यानडाले अग्रता लिएको थियो। जोनाथन डेभिडले गोल गरेपछि क्यानडा २-१ ले अघि बढ्यो। तर, अतिरिक्त समयको दोस्रो मिनेटमा सुवारेजले गोल गर्दै खेल पेनाल्टी सूटआउटमा लगे र अन्ततः उरुग्वेलाई नै जिताए।
उरुग्वेका चारवटै पेनाल्टी गोलमा परिणत हुँदा क्यानडाका तीन खेलाडीको मात्रै बल गोलमा परिणत भयो। उरुग्वेका लागि फेडरिको भाल्भाडे, रोड्रिगो बेन्टकुर, जियोरजियन डेनियल बेन्डिट, र लुइस सुवारेजले गोल गरेका थिए। उता क्यानडाका जोनाथन डेभिड, मोइस बोमबिटो, म्याथ्यु चियोनिरेले मात्र गोल गर्दा इस्मेल कोने र अल्फानोस डेभिसको प्रहार खेर गएको थियो।
कोपा अमेरिकाको उपाधिका लागि सोमबार विहान अर्जेन्टिना र कोलम्बिया आमने-सामने हुनेछन्।
