काठमाडौं (हाम्रो खेलकुद) – नेपाली राष्ट्रिय टोलीका कप्तान तथा गोलरक्षक किरण चेम्जोङसम्मिलित माजिया स्पोर्टस एण्ड रिक्रियसन माल्दिभ्सको प्रतिष्ठित एफए कपको च्याम्पियन बनेको छ ।
आइतबार राति भएको खेलमा क्लब भ्यालेन्सियालाई २–० ले पराजित गर्दै माजिया च्याम्पियन बन्न सफल भएको हो । माजियाको जितमा नाइज हसन र हम्जा मोहम्मदले गोल गरे ।
पहिलो हाफमा भएको दुई गोल नै माजिया च्याम्पियन बन्न सफल भयो । यस खेलमा गोलरक्षक किरण भने खेलेका थिएनन् ।माजिया समग्रमा तेस्रोपटक च्याम्पियन बनेको हो । माजियाले यसअघि सन् २०१२ र २०१४ मा उपाधि जित्न सफल भएको हो ।
माल्दिभ्समा किरणले माजियाबाट दोस्रो उपाधि जित्न सफल भएको हो । माजियाले गत सिजन माल्दिभ्सको शीर्ष लिग दिवेही प्रिमियर लिगको उपाधि जित्दै ह्याट्रिक उपाधि जितेको थियो । किरण लिगको उत्कृष्ट गोलरक्षकसमेत बनेका थिए । माजियाले पहिलोपटक सन् २०१६ मा लिग उपाधि जितेको थियो ।
यसअघि किरणले सन् २०१८ मा टिसी स्पोर्ट्सबाट उपाधिसँगै उत्कृष्ट गोलरक्षकको अवार्ड जितेका थिए ।
