कमनवेल्थ गेम्स अन्तर्गत महिला टी २० को उपाधि अष्ट्रेलियाले जितेको छ । फाइनलमा भारतलाई नौं रनले हराउँदै अष्ट्रेलियाले उपाधि उचाल्न सफल भयो ।
टस जितेर पहिले ब्याटिङ गरेको अष्ट्रेलियाले २० ओभरमा आठ विकेट गुमाउँदै एक सय ६१ रन बनायो । सुरुवात राम्रो गर्न नसकेपनि उसका मध्यक्रमका खेलाडीले राम्रो साझेदारी गरेका थिए ।
उसका लागि बेथ मोनीले ६१ रन बनाइन भने मेग लानिङले ३६ तथा एस गार्डनेरले २५ रनको योगदान दिइन । यस्तै रिचेल हायनेसले १८ रन थपिन ।
जवाफमा भारत १९ ओभर तीन बलमा अलआउट हुँदै एक सय ५२ रन बनाउन सक्यो । उसका लागि स्मृती मन्दनाले ६ रन बनाइन भने सेफाली बर्माले ११ तथा दिप्ती शर्माले १३ रनको योगदान दिइन ।
यस्तै कप्तान हरप्रित कौरले ६५ रन बनाउँदा जेमिमा रोद्रिगेजले ३३ रनको योगदान दिइन ।
भारतका लागि अन्तिम ओभरमा ११ रन चाहिएको थियो । तर उसले मात्र एक रन बनाउँदा बाँकी दुई विकेट गुमायो । भारतलाई कम स्कोरमा राख्नका लागि आस गार्डेनेरले तीन विकेट लिइन ।
