इटालियन सिरी ‘ए’ मा एसी मिलान र इन्टर मिलानले सफलता हात पारेका छन् । १० खेलाडीमा समेटिएको मिलानले घरेलु टोली साम्पडोरियामाथि २–१ को जित निकालेको छ ।
मिलानको जितमा जुनियर मेसिएस र ओलिभर जिरुउडले गोल गरे । साम्पडोरियाका फिलिप जुरिसिसले एक गोल फर्काए । जेनोभामा शनिबार राति भएको खेलको छैटौं मिनेटमा जुनियर मेसिएसले गोल गर्दै मिलानलाई १–० को अग्रता दिलाए ।
उनले राफायल लियोको पासमा गोल गर्न सफल भएका थिए । २१औं मिनेटमा चार्लेसले गोल गरेपनि भिएआरबाट मान्यता नपाउँदा मिलान अग्रता दोब्बर पार्नबाट चुक्यो । ४७औं मिनेटमा मिलान १० खेलाडीमा समेटिन पुग्यो । राफायल लियो दोहोरो पँहेलो कार्ड खाँदै मैदानबाट बाहिरिए ।
५७औं मिनेटमा फिलिपले गोल गर्दै खेललाई १–१ गोलको बराबरीमा ल्याए । ६७औं मिनेटमा ओलिभर जिरुउडले पेनाल्टीमा गोल गर्दै मिलानको जित पक्का गराए । त्यसपछि इन्ज्युरी समयको थप गरिएको सातौ मिनेटमा साम्पडोरिया पनि १० खेलाडीमा समेटिन पुग्यो । मार्काे जियामपाओलो दोहोरो पहेलो कार्ड खाँदै मैदानबाट बाहिरियो ।
यस जितसँगै मिलान ६ खेलबाट १४ अंक जोडेर दोस्रो स्थानमा रहेको छ । समान १४ अंक नै रहेपनि नेपोली शीर्षस्थानमा रहेको छ । साम्पडोरिया २ अंक जोडेर १८औं स्थानमा छ ।
सिरी ‘ए’ कै अर्काे खेलमा इन्टर मिलानले टोरिनोलाई तथा नेपोलीले स्पेजियालाई समान १–० ले पराजित गरेको छ । इन्टरको जितमा ८९औं मिनेटमा मार्सेलो ब्रोजोभिकले गरेको गोल नै निर्णायक बन्यो ।
अर्काे खेलमा नेपोलीले स्पेजियालाई १–० ले पराजित गर्दा जियानलुका रास्पाडोरीले ८९औ मिनेटेमा गरेको गोल नै निर्णायक बन्यो । इन्ज्युरी समयको थप गरिएको पहिलो मिनेटमा नेपोलीका लुसियानो स्पालेटी दोहोरो पहेलो कार्ड खाँदै मैदानबाट बाहिरिए ।
यो नतिजापछि इन्टर १२ अंक जोडेर चौथो स्थानमा रहेको छ । टोरिनो १० अंक जोडेर सातौ स्थानमा रहेको छ । नेपोली १४ अंक जोडेर शीर्षस्थानमा रहँदा पराजित स्पेजिया ५ अंक जोडेर १४औं स्थानमा छ ।
