फरवार्ड ब्रील एम्बोलोको गोलमा स्विटजरल्यान्डले फिफा विश्वकप २०२२ अन्तर्गत समूह एचको खेलमा क्यामरुनलाई पराजित गरेको छ ।
एम्बोलोले खेलको ४८ औं मिनेटमा गरेको गोल नै स्वीस टोलीको जितमा निर्णायक सावित भयो । उनले जेर्डान शाकिरीको क्रसलाई सदुपयोग गर्दै गोल गरेका थिए । शाकिरीले दायाँ विंगबाट दिएको लो क्रसलाई एम्बोलोले ६ यार्ड बक्सको नजिकबाट गोल गरेका थिए ।
त्यसअघि पहिलो हाफमा गोलरक्षक यान सोमरले उत्कृष्ट बचाउ गर्दा खेल गोलरहित बराबरीमा अडेको थियो । सोमरले क्यामरुनका कप्तान एरिक चुपो मोटीङलाई वन भर्सेस वनमा विफल पारेका थिए । पहिलो हाफमा केहि कमजोर देखिएको स्वीस आक्रमणले दोस्रो हाफमा भने लय समातेको थियो । अग्रता लिएपछि स्वीस टोलीले मिडफिल्डमा बल राखेपछि क्यामरुनले धेरै अवसर सिर्जना गर्न पाएन ।
यस जितले स्विटजरल्यान्डको ३ अंक भएको छ । आजै समूह जी को अर्को खेलमा ब्राजिल र सर्बिया भिड्नेछन् ।
