इंग्लिस प्रिमियर लिग अन्तर्गत आइतबार भएको खेलमा म्यानचेस्टर युनाइटेडले आर्सनललाई सिजनको पहिलो हार चखाएको छ । युनाइटेडको घरेलु मैदान ओल्ड ट्राफर्डमा आर्सनल ३-१ ले पराजित भयो ।
प्रशिक्षक एरिक टेन हागले सुरुवाती रोजाइमा स्थान दिएपछि एन्टोनीले खेलको ३५ औं मिनेटमा युनाइटेडलाई अग्रता दिलाए । उनले मार्कस रासफर्डको पासलाई पेनाल्टी क्षेत्र भित्रबाट सुन्दर फिनिस गरे । राइट विंगमा निकै छरितो देखिएका एन्टोनीले उच्च प्रदर्शन गरिरहेका छन् । उनी डेब्युमा गोल गर्ने युनाइटेडका २१ औं खेलाडी हुन् ।
त्यसअघि आर्सनलले खेलमा अग्रता लिएपनि रेफ्रीले भिडियो असिस्टेन्ट रेफ्रीको सहायता लिँदै उक्त गोललाई मान्यता दिएनन् । ग्याब्रिएल मार्टिनेल्लीले आर्सनललाई अग्रता दिलाएपनि उक्त मुभ सिर्जना हुँदा कप्तान मार्टिन ओडेगार्डले क्रिस्टियन एरिक्सनलाई फल गरेको भीएआरले देखाएको थियो ।
दोस्रो हाफको ६० औं मिनेटमा आर्सनलले बराबरी गोल फर्कायो । युनाइटेडको डिफेन्समा कमजोरीको फाइदा उठाउँदै बुकायो साकाले गोल गरे । तर ६ मिनेटपछि नै युनाइटेडले पुन: अग्रता लियो । ब्रुनो फर्नान्डेसको उत्कृष्ट पासमा रासफर्डले अफसाइड ट्रयाप बिट गर्दै गोल गरे ।
७५ औं मिनेटमा रासफर्डले व्यक्तिगत दोस्रो गोल गर्दै युनाइटेडको अग्रता दोब्बर पारे । क्रिस्टियन एरिक्सनले वन भर्सेस वनको स्थितिमा पेनाल्टी क्षेत्र भित्रबाट दिएको पासलाई उनले सहजै गोल गरे ।
यस जितसँगै युनाइटेडको ६ खेलमा १२ अंक भएको छ । सुरुवाती दुई खेल हारेको युनाइटेडले त्यसयता सबै खेलमा जित हासिल गरेको छ । आर्सनल भने पहिलो हारका बाबजुद अंक तालिकाको शीर्ष स्थानमा रहयो । आर्सनलले ६ खेलमा १५ अंक जोडेको छ । म्यानचेस्टर सिटी र टोटेनहमको समान १४-१४ तथा ब्राइटनको १३ अंक छ ।
