सुरुवाती अग्रता जोगाउन नसक्दा शीर्ष दौडमा रहेको म्यानचेस्टर सिटी इंग्लिस प्रिमियर लिगमा बराबरीमा रोकिएको छ ।
सिटी घरेलु मैदानमा एभर्टनसँग १–१ गोलको बराबरीमा रोकिएको हो । सिटी एर्लिङ ब्राउट हालान्डले गोल गर्दा एभर्टनका डेमाराई ग्रेले बराबरी गोल फर्काए ।
इतिहाद स्टेडियम म्यानचेस्टरमा शनिबार राति भएको खेलको २४औं मिनेटमा हालान्डको गोलबाट सिटीले पहिलो हाफमा १–० को अग्रता लिएको थियो । उनले रियाद महारेजको पासमा गोल गर्न सफल भएका थिए ।
तर, सिटीले त्यो अग्रतालाई दोस्रो हाफमा जोगाउन सकेन । ६४औं मिनेटमा डेमाराई ग्रेले गोल गर्दै खेललाई १–१ गोलको बराबरीमा ल्याए । उनले इड्रिसा गाना गुआईको पासमा गोल गर्न सफल भएका थिए । त्यसपछि थप गोल निस्कन नसक्दा खेल बराबरीमा रोकियो ।
यस बराबरीसँग सिटीले शीर्षस्थानको आर्सनलसँगको अंक दुरी छोट्याउने अवसर गुमाउँदा ७ अंकले पछि परेको छ । दोस्रो स्थानमा रहेको सिटीको १६ खेलबाट ३६ अंक पुगेको छ । आर्सनलको समान खेलबार्ट ४३ अंक छ । एभर्टन १५ अंक जोडेर १६औं स्थानमा छ ।
