इंग्लिस प्रिमियर लिग फुटबलमा साविक विजेता म्यानचेस्टर सिटीले अर्लिङ हालान्डको ह्याट्रिकको मद्दतले क्रिष्टल प्यालेसलाई ४–२ गोल अन्तरले पराजित गरेको छ । २ गोलले पछि परेको सिटीले पुनरागमन गर्न सफल भएको हो ।
क्रिष्टलले चौथो मिनेटमा उपहार गोलमार्फत अग्रता लिएको थियो । जोन स्टोनले आफ्नै पोस्टमा गोल गरेपछि १–० गोलको अग्रता लियो । २१ औं मिनेटमा जोचिम एन्डरसनले गोल गरेपछि अग्रता दोब्बर बनायो ।
पहिलो हाफमा २ गोलले पछि परेको सिटीले सवै गोल दोस्रो हाफमा फर्काएको थियो । ५३ औं मिनेटमा बर्नान्डो शिल्भाले गोल गरेपछि सिटीले अग्रता १–२ मा ल्याएको थियो । हालान्डले ६२ औं मिनेटमा गोल गरेपछि सिटीले खेल २–२ को बराबरीमा ल्याएको थियो । ७० औं मिनेटमा हालान्डले व्यक्तिगत दोस्रो तथा टिमका लागि तेस्रो गोल गरे ।
८१ औं मिनेटमा उनै हालान्डले ह्याट्रिक पूरा गर्दा सिटीले ४–२ को जीत दर्ता गर्न सफल भयो । यसै सिजन प्रिमियर लिगमा आएका हालान्डले लिगको चौथो खेलमै ह्याट्रिक गर्न सफल भएका हुन् ।
जीतपछि सिटी ४ खेलबाट १० अंकका साथ शीर्ष स्थानमा छ । प्रिमियर लिगमा चेल्सीले लेस्टर सिटीलाई २–१ गोल अन्तरले पराजित गरेको छ । यस्तै ब्रेन्टफोर्ड र एभर्टनले एक एक गोल को बराबरी खेले ।
