नर्वेली युवा फरवार्ड एर्लिङ ब्राउट हालान्डको ह्याट्रिकमा म्यानचेस्टर सिटीले सानदार जित दर्ता गरेको छ ।
घरेलु मैदानमा सिटीले नटिङहम फरेस्टलाई ६–० को भारी अन्तरले पराजित गरेको हो ।
जुलियन अल्भारेजले दुई तथा जोआओ क्यान्सेलोको एक गोल थपे । इतिहाद स्टेडियममा बुधबार राति गोलको वर्षा भएको खेलको १२औं मिनेटमा हालान्डको गोलबाट अग्रता लिएको थियो । उनले फिल फोडेनको पासमा गोल गर्न सफल भएका थिए ।
२३औं मिनेटमा हालान्डले व्यक्तिगत र टोलीका लागि दोस्रो गोल गर्दै अग्रता दोब्बर पारे । ३८औं मिनेटमा हालान्डले ह्याट्रिक पुरा गरेपछि सिटीले पहिलो हाफमै ३–० को आरामदायी अग्रता लिन सफल भए । उनले जोन स्टोन्सको पासमा गोल गर्न सफल भएका थिए ।
हालान्डले लगातार दोस्रो खेलमा ह्याट्रिक पूरा गरेका हुन् । यसअघि हालान्डले क्रिस्टल प्यालेसमाथि ४–२ को जित निकाल्दा ह्याट्रिक पूरा गरेका थिए । यसै समरमा सिटी आएका हालान्डले आफ्नो उच्च प्रदर्शनलाई निरन्तरता दिदा ५ खेलेमा ९ गोल गरिसक्दा एक असिस्ट दिएका छन् ।
५०औं मिनेटमा जोओ क्यान्सेलोले बर्नाडो सिल्भाको पासमा गोल गरेपछि सिटी ४–० ले अघि बढ्यो । त्यसपछिको दुवै गोल अल्भारेजको नाममा रह्यो । ६५औं मिनेटमा अल्भारेजले गोल गरेपछि सिटी फराकिलो जिततर्फ अग्रसर बन्यो । ८७औं मिनेटमा अल्भारेजले व्यक्तिगत दोस्रो तथा टोलीका लासग छैटौं गोल गर्दै सिटीलाई सानदार जित दिलाए ।
सानदार जितसँगै सिटी ५ खेलबाट १३ अंक जोडेर दोस्रो स्थानमा यथावत रहेको छ । पराजित नटिङहम फरेस्ट ४ अंक जोडेर १५औं स्थानमा रहेको छ । शीर्षस्थानको आर्सनलको १५ अंक छ ।
