हंगेरीमाथि सहज जित निकाल्दै इटाली युइएफए नेसन्स लिगको फाइनल फोरमा प्रवेश गरेको छ । इटालीले घरेलु टोली हंगेरीलाई २–० ले पराजित गरेको हो ।
इटालीको जितमा जियाकोमो रास्पाडोरी र फेडरिको डिमार्काेले गोल गरे । इटालीले पहिलो र दोस्रो हाफमा समान एक गोल गर्दै सहज जित निकाल्न सफल भयो ।
पुस्कास एरिना बुढापेस्टमा सोमबार राति भएको खेलको २७औं मिनेटमा जियाकोमो रास्पाडोरीले गोल गर्दै इटालीलाई अग्रता दिलाए । त्यसपछि ५२औं मिनेटमा फेडरिको डिमार्काेले गोल गर्दै इटालीको सहज जित पक्का गरे ।
यस जितसँगै इटाली लिग ए ग्रुप ३ मा ६ खेलबाट ११ अंक जोडेर शीर्षस्थानमा रह्यो । पराजित हंगेरी १० अंक जोड्दै दोस्रो स्थानमा रहँदा फाइनल फोरमा पुग्न असफल रह्यो ।
दुवै टोली यस विश्वकपमा छनोट हुन असफल टोली हुन् । तर, यि दुई टोलीले नेसन्स लिगमा भने गज्जवको प्रदर्शन गरेको थियो । यसअघि क्रोएसिया र नेदरल्यान्डले नेसन्स लिगको फाइनल फोरमा स्थान बनाइसकेका छन् ।
यही समूहको अर्काे खेलमा जर्मनी र इंग्ल्यान्डले ३–३ गोलको बराबरी खेल्दै अंक बाँडेका छन् । इंग्ल्यान्ड यसअघि नै रेलिगेसनमा परिसकेको छ । जर्मनीले ७ तथा इंग्ल्यान्डले ३ अंक जोड्न सक्यो ।
