फरवार्ड मोहम्मद सलाहले गोलसँगै असिस्ट प्रदान गरेपछि इंग्लिस प्रिमियर लिगमा लिभरपुलले सहज जित हात पारेकाे छ ।
लिभरपुलले घरेलु टाेली एस्टन भिल्लामाथि ३–१ काे सहज जित हात पारेकाे हाे । लिभरपुलकाे जितमा माेहम्मद सलाह, भर्जिल भान डाइक र स्टेफन बाजसेटिकले गाेल गरे । घरेलु टाेली भिल्लाका ओली वाट्किन्सले एक गाेल फर्काए ।
भिल्ला पार्क बर्मिङहममा सोमबार राति भएको खेलको पाँचौ मिनेटमा नै मोहम्मद सलाहको गोलबाट लिभरपुलले १–० को अग्रता लिएको थियो । उनले एन्ड्रिउ रोबर्टसनको पासमा गोल गर्न सफल भएका थिए ।
३७औं मिनेटमा डिफेन्डर भर्जिल भान डाइकले गोल गर्दै लिभरपुललाई पहिलो हाफ मा २–० को अग्रता दिलाए । उनले मोहम्मद सलाहको पासमा गोल गर्न सफल भएका थिए ।
५९औं मिनेटमा ओली वाट्किन्सले गोल गर्दै भिल्लालाई २–१ को स्थितिमा ल्याएर खेलमा फर्कने संकेत दिए । वाट्किन्सले डगलस लुइजको पासलाई सदुपयोग गरेका थिए ।
८१औं मिनेटमा परिवर्तित खेलाडी स्टेफन बाजसेटिकले गोल गर्दै लिभरपुललाई ३–१ को जित दिलाए । ७९औं मिनेटमा कप्तान जोर्डन हेन्डरसनको स्थानमा मैदान छिरेका उनले दुई मिनेटको अन्तरमै गोल गर्न सफल भएका थिए ।
यस जितसँगै लिभरपुल १५ खेलबाट २५ अंक जाेडेर छैटाैं स्थानमा रहेकाे छ । पराजित एस्टन भिल्ला १६ खेलबाट १८ अंक जाेडेर १२औं स्थानमा छ ।
